Вайроналар орасидаги лиманликлар, истило остидаги Креминна ҳаёти. Уруш суратлари

 Украинада урушнинг 333-куни ўтди. Асосий маълумотлар:

• Украиналик разведкачи ва РФ билан музокаралар иштирокчиси Денис Киреев Украина хавфсизлик хизмати автомобилида ўлдирилган, бу ҳақда Украина ҳарбий разведкаси бошлиғи Кирилл Буданов маълум қилди. Унинг айтишича, Киреев иккиёқлама агент бўлиши мумкин эмасди, унинг вазифаси Россия билан 2022 йил мартидаги музокараларда жараённи чўзиш ва бу орқали Украина қуролли кучлари учун вақтдан ютишга имкон бериш бўлган.
• Украиналик журналистлар ўз мамлакати мудофаа вазирлигини ҳарбий хизматчилар учун озиқ-овқат маҳсулотларини бозор нархидан икки-уч баробар қимматга харид қилишда гумонлади. Вазирлик бу борадаги суриштирув «чалғитувчи фикр» эканини билдириб, бу борада Украина хавфсизлик хизматига мурожаат қилишга ваъда берди. Давлат аудиторлик хизмати тузилган ҳарбий шартномаларни текширишга киришди.
• Полша ҳукумати немис танкларисиз ҳам «кичик коалиция» Украинага танклар етказиб беришга тайёрлигини маълум қилди.
• Буюк Британиянинг собиқ бош вазири Борис Жонсон Украинага келди. У Буча ва Бородянкада бўлди, шунингдек Киевда Володимир Зеленский билан учрашди.
• Давлат думаси спикери Вячеслав Володин Украинага янги қуроллар етказиб берилиши фонида Ғарб давлатларига «глобал фалокат» ва «яксон этиш» билан таҳдид қилди.

Днипрода хотирлаш маросими 

Лимандаги ҳаёт

Украина қуролли кучлари октябр ойи бошида Донецк областининг Лиман шаҳрини қайтариб олганди. Бу куз ўрталаридаги қарши ҳужум натижаси бўлганди — бунгача Россия армияси тўрт ой давомида ушбу шаҳарни оккупация қилиб турганди. РФ мудофаа вазирлиги ўшанда Лиман бой берилишини қўшинларни «нисбатан қулайроқ позицияларга олиб ўтиш» зарурати билан изоҳлаганди. Шаҳар ҳамон отишмалардан жабр чекмоқда, аҳоли ертўлаларда яшашга мажбур бўлмоқда.

Истило остидаги Креминна

Апрел ойи ўрталарига келиб Луҳанск областидаги Креминна шаҳрида кўча жанглари якунланган ва россиялик ҳарбийлар шаҳарни ўз назоратига олганди. Креминна Луҳанскдан тахминан 125 километр шимоли-ғарбда жойлашган, Лисичанскдан эса 33 км масофада. Креминна Украина қуролли кучлари қарши ҳужуми мақсадларидан бири: ҳозирга қадар украинлар россияликларнинг ушбу ҳудуддаги позицияларини ўққа тутмоқда. Област ҳарбий маъмурияти раҳбари Сергей Гайдайга кўра, россияликлар шаҳарга қўшимча кучлар келтирган. Америкадаги Урушларни тадқиқ этиш институти таҳлилчилари ҳисоблашича, яқин вақтлар ичида Россия қўшини Луҳанск областида йирик юриш бошлаши мумкин.