Сахаров фонди Россияда «номақбул ташкилот» деб эълон қилинди

Расмийлар таъкидлашича, фонд фаолияти Россиянинг «конституциявий тузуми ва хавфсизлиги асосларига таҳдид солади».

Фото: picture-alliance/dpa/Sputnik/N. Seliverstova

Россия ҳукумати 23 январь, душанба куни Америка нодавлат ташкилоти The Andrei Sakharov Foundation (Андрей Сахаров фонди)ни Россия Федерацияси ҳудудидаги «номақбул ташкилот» деб эълон қилди.

Фонд фаолияти «Россия Федерациясининг конституциявий тузуми асослари ва хавфсизлигига таҳдид солади», дейилади Россия Бош прокуратураси томонидан чоп этилган пресс-релизда. Маҳкама хабарида ушбу ташкилот айнан нима билан шуғулланаётгани ҳақида батафсил маълумот берилмаган.

The Andrei Sakharov Foundation веб-сайтида таъкидланганидек, фонд 1989 йилда ташкил этилган. У совет физиги, тинчлик учун Нобел мукофоти совриндори Андрей Сахаровнинг интеллектуал ва илмий меросини сақлаб қолишга интилади.

Россияда «номақбул ташкилотлар» тўғрисидаги қонун 2015 йилда қабул қилинган. Россия Федерацияси ҳудудида фаолияти номақбул деб тан олинган ташкилотларнинг рўйхати Россия Адлия вазирлиги томонидан юритилади. Айни пайтда рўйхатга 70 дан ортиқ ташкилот киритилган.