Францияда пенсия ислоҳотига қарши намойишлар давом этмоқда

Франция ҳукумати пенсия ёшини 62 ёшдан 64 ёшгача кўтармоқчи. Ислоҳотга қарши норозиликнинг янги тўлқини миллиондан ортиқ одамни тўплади.

Фото: Anadolu agency

Францияда пенсия ислоҳотига қарши кенг кўламли норозилик намойишлари сусаймаяпти. Намойишларнинг янги тўлқини 31 январь, сешанба куни ҳам давом этди. Расмийлар намойишчилар сонини 1,27 миллион деб ҳисобламоқда, Франциядаги энг йирик касаба уюшмалари уюшмаларидан бири CGT бу рақамни 2,8 миллион деб атамоқда. Биргина Парижнинг ўзида, полиция маълумотларига кўра, 87 мингга яқин одам кўчага чиққан.

Шу тариқа, норозиликнинг янги тўлқини иштирокчилар сони бўйича икки ҳафта олдин кўтарилган аввалгисидан аллақачон ошиб кетди. Ўшанда, расмий маълумотларга кўра, жами 1,2 миллион киши Франция шаҳарлари кўчаларига чиқди. Францияда режалаштирилган ислоҳотга қарши илк норозилик намойишлари 2022 йил сентябрида бўлиб ўтган.

Касаба уюшмалари раҳбарлари бу билан тўхтамасликка ваъда берди. Улар 7 ва 11 февраль кунлари янги норозилик намойишлари уюштириш ниятида.

Пенсия тизимини ислоҳ қилиш президент Эммануэл Макроннинг сайловдаги асосий ваъдаларидан биридир. Ислоҳотнинг асосий қоидалари Франция бош вазири Элизабет Борн томонидан санаб ўтилган. Пенсия ёшини 62 ёшдан 64 ёшга, ходимларнинг пенсия жамғармасига тўлов тўлашининг энг кам муддатини 43 ёшга ошириш режалаштирилган. Шу билан бирга, энг кам пенсия ойига 1200 еврогача кўтарилади.

Борннинг сўзларига кўра, ислоҳотдан мақсад Франция пенсия жамғармасида 2030 йилга бориб, прогнозларга кўра, 20 миллиард еврога етиши мумкин бўлган маблағ тақчиллигини олдини олишдир. Бироқ касаба уюшмалари, ўнг қанот популистик "Миллий бирлашув" партияси ва сўл сиёсатчилар ҳукуматнинг режаларини асоссиз даражада қаттиққўл деб ҳисоблайди. Касаба уюшмаси етакчиларининг айтишича, ислоҳот барча француз ишчиларига, айниқса эрта иш бошлаган ва умр кўриш давомийлиги мамлакатдаги ўртачадан паст бўлган ишчиларга таъсир қилади.

Агар пенсия ислоҳоти парламентда кўпчилик овозга эга бўлмаса, бош вазир конституциянинг 49.3-бандидан фойдаланиб, қонунни овоз беришсиз қабул қилиши мумкин - бунда, кейин ҳукуматга ишончсизлик вотуми чиқарилмаслиги керак бўлади.