Путин 2024 йилги президентлик сайловлари «барча демократик конституциявий тартибларга риоя қилинган ҳолда» ўтказилишига ваъда берди

У ҳозирча янги муддат учун номзодини қўйишини эълон қилмаган.

Фото: ТАСС

РФ президенти Владимир Путин Федерал мажлисга мурожаати вақтида 2024 йилги президентлик сайловлари, шунингдек 2023 йил сентябрига белгиланган губернаторлик сайловлари ва регионларда қонунчилик кенгашлари учун сайловлар «қонунга қатъий риоя қилинган ҳолда» ўтказилишини айтди. Унинг бу борадаги сўзлари «Интерфакс» томонидан келтирилган.

«Таъкидлашни истардимки, шу йил сентябрида маҳаллий ва минтақавий органлар учун сайловлар, шунингдек 2024 йилги президентлик сайловлари — қонун талабларига ва барча демократик конституциявий тартибларга қатъий риоя этилган ҳолда ўтказилади», — деган Путин.

Январ ойи бошида «Коммерсант» манбаси Кремль 2024 йилги президентлик сайловларига унда Владимир Путин ҳам иштирок этишидан келиб чиққан ҳолда тайёргарлик кўра бошлаганини хабар қилганди. Владимир Путин ҳозирча янги муддат учун номзодини қўйиши ҳақида эълон қилмаган. РФ президентлиги учун сайловлар 2024 йил 17 мартида бўлиб ўтиши кўзда тутилган.
2023 йил 10 сентябрида 25 регионда, жумладан Москва шаҳри ва Москва областида губернаторлик сайловлари ўтказилади. 20 регионда, жумладан Россия ҳукумати Украинадан қўшиб олган ҳудудларда эса ҳудудий парламентлар депутатлари сайланади.