Оҳангаронда бола ўғрилари пайдо бўлгани ҳақида хабар тарқалди. Вилоят ИИББ рад этди

Телеграм-каналларда Оҳангаронда бола ўғирламоқчи бўлган аёллар қўлга тушгани ҳақида видео тарқалмоқда. Видеода кўп қаватли уйлар жойлашган маҳалладан узоқлашаётган уч нафар аёлни шу ерда яшовчи хотин-қизлар таъқиб қилаётгани кўринади.

Маҳаллий аҳоли томонидан саволга тутилаётган аёллар ҳеч бир саволга жавоб бермасдан йўлида қочиб кетаётганда воқеа жойига ички ишлар ходимлари етиб келган. Маълум бўлишича, ходимлар аҳолининг 102 қисқа рақамига қўнғироғидан кейин етиб келган.

Тасвирларда бола ўғирлашда гумонланаётган аёлларнинг бири ички ишлар ходимларининг талабига бўйсунмаётгани, шу ерда яшовчи аёллар билан ёқалашгани акс этган.

Тошкент вилоят ИИББ ахборот хизмати раҳбари Kun.uz сўровига жавобан муҳокамаларга сабаб бўлаётган ҳолат юзасидан қуйидагиларни маълум қилди.

“Интернетда тарқалган видеодан хабарим бор. Тез орада ҳолат юзасидан расман муносабат билдирамиз. Ижтимоий тармоқларда тарқалган хабарлар ҳақиқатга тўғри келмайди. Оҳангаронда бола ўғирламоқчи бўлгани айтилаётган аёллар аслида турли хил ҳашарот ва зараркунандаларга қарши дорилар ва дезинфекция воситаларини сотиш билан шуғулланадиган шахслар экани аниқланди.

Улар видеода акс этган ҳудуддаги “дом”лар орасида юришганида шу ерда яшовчилардан бири уларни видеога олиб бола ўғирлашмоқчи бўлиб юрган аёллар юрибди дея тарқатиб юборган. Яқинда Тошкент шаҳрида бир қанча аёл бола ўғирламоқчи бўлгани ҳақида ёлғон хабарлар тарқалганди. Видеони тарқатган шахс уларни ана шу аёлларга ўхшатиб юборган.

Шундан кейин маҳалладаги аёллар чиқиб аёлларни ушлашган, бақир-чақир бўлган. Воқеа жойига профилактика инспекторлари етиб борган. Аёлларнинг ёнидан тегишли ҳужжатлар ва дори воситалари чиққан. Ҳолат бўйича ҳужжатлар расмийлаштирилиб, аёлларга чора кўриш учун солиқ органига топширилган”, дейди Бобур Тўлаганов.

Тошкент вилояти ИИББга кўра, воқеа 20 февраль куни содир бўлган. Суриштирув давомида аёлларнинг шахсига аниқлик киритилган ва уларнинг барчаси Тошкент шаҳрида яшаши аниқланган.

20 февраль куни Яшнободда болани ўғирламоқчи бўлгани айтилган шахс қўлга олинганди.

18 февраль куни ҳам Тошкентда бола ўғрилари пайдо бўлгани ҳақида хабарлар тарқалган, Тошкент шаҳар ИИББ ахборот хизмати ушбу хабарлар асоссиз экани, уларга ишонмасликни, бу каби ёлғон хабарларни тарқатган шахсларни аниқлаш юзасидан текширув ўтказилаётганини маълум қилганди.

Аввалроқ ижтимоий тармоқларда пойтахтнинг Учтепа ва Шайхонтоҳур туманларида, шунингдек, Самарқанд вилоятида мактаб ўқувчилари ўғирлаб кетилгани ҳақида овозли хабарлар тарқалган, бироқ Тошкент шаҳрида содир бўлгани айтилган ҳолатлар ёлғон бўлиб чиққан, Самарқандда эса ўқувчи қизнинг қулоғидаги зираги ўғирлаб кетилгани аниқланганди.

2022 йилнинг апрелида ижтимоий тармоқларда тарқалган пойтахт мактаб ва боғчаларида бир кун ичида 5 нафар бола ўғирлаб кетилгани ҳақидаги хабарлар ҳам рад этилганди.

Бундай хабарлар 2021 ва 2020 йилларда ҳам тарқалган, кейинчалик уларнинг фейк экани маълум бўлганди.