Блинкен: Россия ўт очиш тўхтатилишидан янги ҳужум учун фойдаланади

Бирлашган Миллатлар Ташкилоти Хавфсизлик Кенгаши аъзолари Украинада «вақтинчалик ёки шартсиз ўт очишни тўхтатиш» таклифи билан чалғимасликлари керак, чунки Россия бундай ҳаракатдан кучларни қайта таъминлаш ва яна ҳужум қилиш учун фойдаланади. Бу ҳақда АҚШ Давлат котиби Энтони Блинкен 24 февраль, жума куни БМТ Хавфсизлик кенгашининг Украина бўйича йиғилишида айтиб ўтди.

«Хавфсизлик Кенгаши вақтинчалик ўт очишни тўхтатиш ёки олдиндан шартларсиз ўт очишни тўхтатиш чақириқлари билан чалғимаслиги керак. Россия ноқонуний эгаллаб олинган ҳудуд устидан назоратни мустаҳкамлаш ва кейинги ҳужумлар учун ўз кучларини қайта қуроллантириш учун ҳарбий ҳаракатлар тўхтатиб турилишидан фойдаланади», - деди Блинкен Хавфсизлик Кенгаши «адолатли ва мустаҳкам тинчлик»ни таъминлаши кераклигини таъкидлаб.

Бундай «сулҳ» 2015 йилда содир бўлган, деб эслайди Блинкен: «Қаранг, кейин нима бўлди». Бир вақтнинг ўзида мамлакатларнинг Украина ва Россияга ҳарбий ҳаракатларни тўхтатишга чақириқларини у «ёлғон тенглаштириш» деб атади. «Бу урушда тажовузкор ҳам бор, қурбон ҳам бор. Россия босқинчилик учун курашмоқда, Украина озодлик учун курашмоқда. Агар Россия урушни тўхтатса, бошқа уруш бўлмайди. Украина урушни тўхтатса - Украина бўлмайди», — дея хулоса қилди Блинкен.

Блинкен ўз нутқида Хитойни тилга олмади, бироқ жаҳон оммавий ахборот воситалари таъкидлаганидек, унинг сўзларини ХХР таклиф қилган Украина учун «Тинчлик режаси»га жавоб сифатида талқин қилиш мумкин. Хитой Халқ Республикаси Ташқи ишлар вазирлиги томонидан 24 февраль куни эълон қилинган режанинг 12 банди орасида «барча мамлакатлар суверенитетини ҳурмат қилиш», «совуқ уруш менталитетидан воз кечиш», «ҳарбий ҳаракатларни тўхтатиш», «Москва ва Киев ўртасида тўғридан тўғри мулоқотни қайта тиклаш», шунингдек, «бир томонлама санкцияларни бекор қилиш» кабилар бор.