Россияда Путиннинг 2000 йилги президентлик кампаниясини ишлаб чиққан сиёсатшунос вафот этди 

Россиялик сиёсатшунос, публицист ва сиёсий технолог Глеб Павловский оғир хасталикдан сўнг 72 ёшида вафот этди, деб хабар бермоқда 27 февраль, душанба куни Россия ОАВ. Уларга кўра, Павловский инсультдан вафот этган. Унинг оғир касаллиги ижтимоий тармоқларда ўтган йилнинг ноябрь ойидан бери ёзилганди. 

Глеб Павловский 90-йилларда Россия Федерацияси президенти маъмурияти раҳбарининг маслаҳатчиси бўлган. У Владимир Путиннинг 2000 йилги президентлик кампаниясини ишлаб чиққан «Самарали сиёсат жамғармаси»нинг асосчиси ва раҳбари эди. Павловский 2004 йилги Украинадаги сайловларда Виктор Януковичнинг президентлик кампаниясида ҳам иштирок этган. 2011 йилгача сиёсатшунос Россия Федерацияси президенти маъмурияти билан ҳамкорлик қилди, шундан сўнг у Кремлга сиёсий мухолифатга ўтди.

Бир неча йиллар давомида Павловский «Русский журнал»нинг бош муҳаррири ва ношири, НТВ телеканалидаги «Реальная политика» дастурининг бошловчиси, «Русский институт» директори бўлган. Россия Украинага бостириб кирганидан кейин у Путиннинг кескин танқидчиси сифатида чиқди, лекин Москвада қолди.