ISW: Россия ядровий шантаж билан Киев қўллаб-қувватланишини секинлаштиришга уриняпти

Кремль Ғарбнинг Украинадаги можаронинг ядровий кучайиб кетишидан ташвишланишидан фойдаланиб, Ғарбнинг Киевни қўллаб-қувватлашини чеклаш ва унга қурол етказиб беришни секинлаштиришга уринаётган бўлиши мумкин. Бу ҳақда Америка урушни ўрганиш институти (ISW) ўзининг янги ҳисоботида маълум қилди.

Америка урушни ўрганиш институти янги ҳисоботида АҚШ давлат котиби Энтони Блинкен ва Россия ташқи ишлар вазири Сергей Лавровнинг Нью-Деҳлидаги G20 саммити доирасидаги ўзаро суҳбатига шарҳ эълон қилди.

Блинкен ушбу суҳбат чоғида, хусусан, Москвани Стратегик ҳужум қуролларини қисқартириш бўйича шартномада (СҲҚ-3) иштирок этишни тўхтатиш қарорини қайта кўриб чиқишга чақирган. 

«Россия расмийлари СҲҚ-3’ни қайта тиклаш бўйича мазмунли музокаралар олиб бориши даргумон», - дейди институт таҳлилчилари. 

Шунингдек, «Кремлнинг ядро қуролидан фойдаланиши даргумон, бироқ у мунтазам равишда Ғарбни қўрқитиш мақсадида ядровий кучайиш бўйича ақл бовар қилмайдиган таҳдидлар билан тўла баёнотлар беряпти», деб таъкидлайди ISW.