АҚШ банкларга қўшимча ёрдам ваъда қилди

АҚШ, агар кичикроқ кредиторлар хавф остида бўлса, банк омонатларини ҳимоя қилиш учун яқинда қилинган чораларни такрорлашга тайёр. Бу ҳақда 21 март, сешанба куни мамлакат молия вазири Жанет Йеллен маълум қилди.

Silicon Valley Bank (SVB) ва Signature Bank қулаганидан бир неча кун ўтиб Вашингтондаги Америка банкирлар ассоциацияси билан суҳбатда Йеллен молиявий регуляторларнинг аралашуви бутун АҚШ банк тизимини ҳимоя қилиш учун зарур эканлигини таъкидлади. «Агар кичикроқ муассасалар омонатлар олиб чиқиб кетилишидан зарар кўрса, шунга ўхшаш ҳаракатлар оқланиши мумкин», деди у.

Қўшма Штатлар ҳукумати керак бўлганда молиявий барқарорлик хатарларини юмшатишга «қатъий содиқ», деди Йеллен. «Жамоат бизнинг банк тизимимизга ишончи комил бўлиши керак», деди молия вазири.

Silicon Valley Bank Америка банки 10 март куни Федерал депозитларни суғурталаш корпорацияси (FDIC) назоратига ўтди. У банк активларини янги юридик шахсга ўтказди ва барча омонатчиларга тўлиқ компенсация тўлашни ваъда қилди. SVB - технологик ва венчур фирмаларга хизмат кўрсатувчи, АҚШдаги 16-йирик банкнинг банкротлиги - 2008 йилги молиявий инқироздан кейинги энг йириги бўлди.

SVB билан биргаликда тартибга солувчилар криптовалюта эгалари орасида машҳур бўлган Нью-Йоркдаги Signature Bank'ни ёпдилар. Икки АҚШ банкининг муаммолари ҳақидаги хабар бозор иштирокчиларида хавотир уйғотди.

Йелленнинг айтишича, АҚШ банк тизими молиявий регуляторларнинг чоралари туфайли «барқарорлашмоқда». Расмийлар вазиятни кузатишда давом этадилар, дея қўшимча қилди у.