Россиядан қочган ва Қозоғистондан депортация қилинган майор 6,5 йилга қамалди

Барнаул суди сафарбарликдан қочган ва Қозоғистондан депортация қилинган «ФСО» ходими Михаил Жилинни 6,5 йилга озодликдан маҳрум қилди. У дезертирлик ва чегарани ноқонуний кесиб ўтишда айбдор деб топилди.

Барнаул гарнизони ҳарбий суди Россиядан Қозоғистонга қочиб кетган ва у ердан депортация қилинган «ФСО» майори Михаил Жилинни сафарбарлик пайтида қочоқлик ва чегарани ноқонуний кесиб ўтишда айбдор деб топиб, олти йил-у олти ойга қаттиқ режимли колонияга ҳукм қилди. Бу ҳақда 24 март, жума куни юқори турувчи Иккинчи шарқий округ ҳарбий суди матбуот хизмати хабар берди.

Тергов маълумотларига кўра, захирадаги майор Жилин «ҳарбий хизмат вазифаларини бажаришни истамай ва Украинадаги жанговар ҳаракатлар зонасига юборилишидан қўрқиб» кўчмас мулкни сотган, қўмондонликка ўзининг ногиронлиги ҳақида ёлғон маълумот берган ва назорат пунктини четлаб ўтган ҳолда Россия давлат чегарасини кесиб ўтган, у ерда чегарачилар томонидан қўлга олинган.

Хабарда айтилишича, Жилин ҳарбий унвонидан маҳрум қилинган. Ҳукм ҳали кучга кирмаган.

21 март куни Барнаул гарнизони ҳарбий суди сайтида 20 март куни худди шундай айблов бўйича исми-шарифи ошкор этилмаган, лекин А. деб белгиланган офицерга нисбатан худди шу муддатга ҳукм чиқарилгани ҳақида хабар эълон қилинди. «Новая газета» тахминига кўра, гап айнан Михаил Жилиннинг иши ҳақида кетмоқда.

Михаил Жилин «ФСО»да 18 йил хизмат қилган. Сафарбарлик эълон қилинганидан беш кун ўтиб, у оиласи билан Россияни тарк этишга қарор қилди. Унинг рафиқаси Екатерина ва болалари Қозоғистон чегарасини қонуний равишда кесиб ўтишган, Михаил ўзини мамлакатдан чиқармасликларидан қўрқиб, чегарани ноқонуний кесиб ўтишга қарор қилган.

Эр-хотин Остона ёки Олмаота шаҳрига бориб, қочқинлик мақомини расмийлаштириш учун мурожаат қилишни режалаштирган. Бироқ Қозоғистон чегарачилари Жилинни қўлга олишди. Россия ҳам, Қозоғистон ҳам уни давлат чегарасини ноқонуний кесиб ўтганликда айблаган. Россия томони дезертирлик айбловларини ҳам илгари сурди.

Жилинга 30 ноябрь куни Қозоғистонда қочқин мақомини бериш бўйича рад жавоби тақдим этилди. 2 декабрь куни суд «ФСО» ходимини мамлакатдан чиқариб юбориш ҳақида қарор чиқарди. Шундан сўнг, эр-хотин суднинг депортация тўғрисидаги қарори устидан апелляция берди, шунингдек, қочқин мақомини беришни рад этиш устидан шикоят қилиш тартибини бошлади. 

Россия «ФСО» ходимини «чегарани ноқонуний кесиб ўтиш» (Жиноят кодексининг 322-моддаси) ва «дезертирлик» (Жиноят кодексининг 338-моддаси) моддалари бўйича халқаро қидирувга берган. 29 декабрь куни Қозоғистон ҳукумати уни Россияга депортация қилди.