Баҳорни муносиб кутиб олмаган пойтахтликлар: ишчилар чиқиндиларни йиғиб тугатолмаяпти

Баҳор Ўзбекистоннинг бошқа ҳудудлари каби Тошкент шаҳрини ҳам яшилликка ўради. Ободонлаштириш ходимлари томонидан 2-3 маҳал тозалаб чиқилишига қарамай, одамлар табиатни, шаҳарни чиқинди билан қориштириб юборяпти. Kun.uz пойтахтнинг турли нуқталаридан чиқиндига ботган қайғули манзаралар суратларини тўплади.

Шаҳардаги турли боғ ва хиёбонларга яшиллик югурган. Бу манзара айниқса, Тошкентдаги анҳорлар бўйида кўпроқ кўзга ташланади.

Юнусобод тумани, Алишер Навоий кўчаси, Анҳор

Манзарали дарахтлар ва сув бағрида дам олиш кайфиятни кўтаради. Бироқ бу ерларга ташлаб кетилган чиқиндилар дилни хира қилади. Ободонлаштириш ходимлари ҳар соатда айланиб, шаҳарни ҳар қанча тоза тутишга уринмасин, аҳоли ташлаб кетаётган чиқиндилар тугай демайди. Қуйидаги суратлар ички сайёҳлар табиатни қай кўйга солганини яхшироқ ҳис қилиш учун ёрдам беради.

Баҳор даракчиларидан бўлган момақаймоқ ва турли гуллар устига ирғитиб кетилган турли егулик қадоқлари эса пойтахт аҳолиси ва меҳмонларида табиат билан тўғри муносабат ўрнатишда муаммолар кичик эмаслигини кўрсатади.

Шаҳарда дарахтлар кесилиши билан бирга, сувли ҳудудлар ҳам камайгани бор гап. Миллий боғнинг эски ҳудудида жойлашган сунъий кўлнинг қуритилгани бунга мисол. Бироқ мавжуд сувли ҳудудларга ҳам етарлича ҳурмат кўрсатилмаяпти.

Шу нарсани алоҳида таъкидлаш керак, шаҳарда ташлаш учун етарлича чиқинди идишлари йўқ. Бу муаммони Kun.uz ўзининг экологик маданиятга бағишланган туркум мақолаларида ҳам ёритиб келади. Сўнгги вақтда пойтахт бўйлаб чиқинди идишлари кўпайган, лекин бу ҳам керакли самарани бермаяпти.

Кўчага чиқинди ташлашдан нега уялмаймиз?

Ўтлоқларда турли егулик чиқиндилари билан бир қаторда, бир марталик идишлар кўп учрайди. Уларнинг аксари бир марталик чой ёки қаҳва елим стаканларидир.

Ёз яна ҳам исимаслигига ҳали умид бор. Сараланмаган чиқиндининг иқлимга таъсири

Албатта, бу суратлар пойтахт аҳолиси ва меҳмонларининг барчасини маданиятсизга чиқариб қўймайди. Аммо гуруч курмаксиз бўлмаслиги ҳам ҳақиқат. Сўнгги вақтда табиатни асрашга ундовчи экофаоллар ҳам кўпайди. Буни табиатни асрашга тарғиб қилинган ёзувлар кўпайганидан ҳам сезиш мумкин.

Ишдан чиқаётган иқлим ўпкаси – сигаретнинг исишга аянчли таъсири