«Қамбар Ота-1» ГЭС қурилиши бўйича муаммолар санаб ўтилди

Марказий Осиё мамлакатлари минтақада энергия балансига эришиш учун режаларни мувофиқлаштириш муҳим аҳамиятга эга. Бу ҳақда қирғизистонлик иқтисодчи Кубат Раҳимов сўзларини Kaktus.media келтирди. 

Раҳимов Марказий Осиёда ягона энергия бозорини яратиш бўйича режалар қанчалик долзарб эканини баҳолашга чақирди. 

«Биз бир-биримизга жуда боғланганмиз. Агар гидроэнергетика, иссиқлик генерацияси, атом генерацияси ва ягона бозор ҳақида қандай мулоқот қилишни тушуниб олсак, «Қамбар Ота-1» ГЭС қурилиши иқтисодий моделининг контурларини аниқлаб оламиз. Ҳозирча, Қозоғистон бунча беради, Ўзбекистон шунча беради, Қирғизистон бунча ажратади, халқаро институтлар шунча деган аниқ имзоланган ҳужжатларни кўрмаяпман», деди у. 

2023 йил 3 февраль куни Қирғизистон Вазирлар Маҳкамаси раҳбари Оқилбек Жапаров Қирғизистон, Қозоғистон ва Ўзбекистон «Қамбар Ота-1» ГЭС қурилишини ўрганишга киришганини маълум қилганди. Унинг қўшимча қилишича, ушбу лойиҳанинг техник-иқтисодий асослари Евросиё тараққиёт банки билан биргаликда ишлаб чиқилади. 

2023 йил 6 январь куни Ўзбекистон, Қирғизистон ва Қозоғистон «Қамбар-Ота-1» ГЭС бўйича келишув имзолаган эди. Унинг лойиҳа қиймати тахминан 3 млрд долларга баҳоланган.