Украинада Виктор Медведчукнинг хотинига тегишли активлар хатловга олинди

Оксана Марченконинг хатловга олинган активлари бир миллиард гривнадан (27 миллион доллар) ортиқни ташкил қилган. Аввалроқ Украинада Медведчук хотинининг 6 миллиард гривнага тенг мол-мулки хатловга олинган эди.

Оксана Марченко / Фото: ТАСС

Украина суди Виктор Медведчукнинг рафиқаси Оксана Марченконинг бир миллиард гривнадан (27 миллион доллардан ортиқ) кўпроқ мол-мулкини хатловга олди, деб хабар берди 25 апрел, сешанба куни Украина Хавфсизлик хизмати ("СБУ") матбуот хизмати. Идора маълумотларига кўра, гап Европанинг энг йирик металлургия корхонаси бўлган "Запорожский завод ферросплавов"нинг 13,7 фоиз акциялари ҳақида кетмоқда.

"СБУ" маълумотларига кўра, Марченко ушбу активларга тўртта офшор компания орқали эгалик қилган. “Активларнинг хатловга олиниши уларни сотиш ёки сохта шахсларга қайта рўйхатдан ўтказишдан ҳимоя қилади ҳамда келажакда уларни давлатимиз фойдасига ўтказиш имконини беради”, — дейилади маҳкама хабарида.

"СБУ" матбуот хизматининг эслатишича, аввалроқ Украина расмийлари Марченконинг умумий қиймати олти миллиард гривнадан ортиқ мол-мулкини хатловга олишган.

Оксана Марченко - Виктор Медведчукнинг учинчи хотини. Украинада у Россия ҳуқуқ-тартибот идораларини молиялаштиришда гумон қилинмоқда. 23 феврал куни суд унинг 5,6 миллиард гривнадан (тахминан 152 миллион доллар) кўпроқ қийматдаги активларини хатловга олди. Шундан сўнг, Украина расмийлари камида икки марта Марченконинг турли мулклари хатловга олингани ҳақида хабар беришди.

Апрел ойида Украина ҳукумати Марченкони қидирувга берган эди. Виктор Медведчукнинг рафиқаси Москвада яшаётган бўлиши мумкин.