ЖАР президенти: Украина ва Россия Африкадан воситачиларни қабул қилади

Володимир Зеленский ва Владимир Путин Украина ва Россия ўртасида тинчлик режасини муҳокама қилиш учун Африка давлат ва ҳукумат раҳбарларидан иборат делегацияни қабул қилишга келишиб олдилар, деди 16 май, сешанба куни Жанубий Африка Республикаси президенти Сирил  Рамафоса. Унинг сўзларига кўра, бу қарорлар телефон суҳбатлари натижасида қабул қилинган.

“Икки етакчи билан суҳбатларим улар Африка етакчиларини қабул қилишга ва бу можарога қандай барҳам бериш мумкинлигини муҳокама қилишга тайёр эканликларини кўрсатди”, деди Рамафоса Сингапур бош вазири билан қўшма брифингда. Унинг қўшимча қилишича, музокараларнинг муваффақияти муҳокамалар қандай ўтишига боғлиқ.

Рамафосанинг режасини Сенегал, Уганда ва Миср раҳбарлари қўллаб-қувватлади, АҚШ ва Британия ҳукумати эса “эҳтиёткорлик билан” маъқуллади, деди ЖАР президенти. Лондон ва Вашингтондан ташқари, унинг сўзларига кўра, Африка ташаббуси ҳақида БМТ Бош котибига ҳам маълумот берилган. Москва ва Киев ҳозирча Рамафосанинг баёнотига муносабат билдирмади.

Россия Федерацияси ва Украина ўртасидаги музокараларнинг бир неча раунди кенг кўламли урушнинг бошида, охиргиси - 2022 йил март ойида бўлиб ўтди. Украина расмийлари Владимир Путин билан музокаралар олиб боришга тайёр эмасликларини ва ҳудудий ён беришни қатъиян рад этишларини бир неча бор таъкидлаган. Аввалроқ Хитой ўзининг тинчлик режасини ишлаб чиқди, унинг ташаббуси ўт очишни тўхтатиш, барча мамлакатлар суверенитетини ҳурмат қилиш ва бир томонлама санкцияларни тугатишни назарда тутади. Киев ва Вашингтон Хитой режасини қўллаб-қувватламайди. Бироқ, Хитой Ташқи ишлар вазирлигининг махсус вакили Ли Хуэй 15 май куни Россия, Украина ва Европа давлатларига тинчлик келишувини муҳокама қилиш учун сафарини бошлади.