Дронлар Россиядаги нефть қувурларига ҳужум қилишда давом этмоқда

Твер вилоятида Андреапол округидаги Ерохино қишлоғи яқинида учувчисиз учиш аппарати (УУА) қулади, деб хабар берди минтақа ҳукумати матбуот хизмати. Ҳодиса оқибатида ҳеч ким жабрланмаган.

Фото: AP

«Ҳозирда тезкор хизматлар воқеа жойида ишламоқда. Вазият губернатор Игор Руденининг шахсан назоратида», - дейилади хабарда.

Бунгача бир қатор Telegram-каналларида Ерохино қишлоғи яқинида жойлашган нефтни қайта ишлаш заводига дронлар ҳужуми содир этилгани ҳақида хабар берилган эди. Baza, Mash ва SHOT маълумотларига кўра, ҳужумда иккита дрон иштирок этган.

«Биринчи учувчисиз учиш аппарати соат 3:15 да учиб келди. У мой цехи биносига урилди, шундан сўнг портлаш содир бўлди - натижада бинонинг томи ва девори шикастланган. Иккинчи УУА ярим соатдан кейин учиб келди - у ерга қулади ва портлади. Ёнғин корхона ходимлари томонидан ўчирилган, қурбонлар йўқ», деб ёзади Baza.

Маълумот учун, Ерохинодаги станция «Дружба» нефть қувурига хизмат кўрсатади.

27 май куни эрталаб иккита дрон Псков вилояти Невелск тумани Литвиново қишлоғи яқинидаги нефть қувурига ҳужум қилди, деб хабар берди вилоят губернатори Михаил Ведерников Telegram’да.

Ҳужум натижасида нефть қувурининг маъмурий биноси шикастланган, қурбонлар йўқ.

Baza таъкидлашича, дронлар «Транснефт» нефть ўтказиш станциясига ҳужум қилган.

#нефть #дрон