Япония тоза энергия экспорт қилиш учун пауэрбанк-кема қуради

Келажакда у нефть танкерлари ўрнини эгаллаши мумкин.

Фото: prnewswire.com

Япониянинг PowerX стартапи бутун дунё бўйлаб қайта тикланадиган энергия етказиб бериш учун мўлжалланган 96 та кучли аккумуляторга эга кема устида ишламоқда. Биринчи кема 2025 йилгача тайёр бўлади, унинг синовлари бир йилдан сўнг бошланади.

Аккумулятор-кема узунлиги 140 метр бўлиб, 300 километр масофани босиб ўта олади. Танкер бир рейс давомида 241 МВт·с тоза энергияни ташиш имкониятига эга бўлади.

Нефть экспорти миқёсида кема қуввати кичикроқ кўриниши мумкин, деб тан олади компания. Бироқ, кема келажакда кўпроқ аккумуляторлар билан ишлаш имконини берувчи «мослашувчан дизайн»га эга.

Тахминларга кўра, кема портларга кириб, маҳаллий инфратузилмани қувватлантиради. Шунингдек, у денгиздаги шамол станцияларига ва ерости ёки сувости кабелларидан фойдаланиш қийин бўлган жойларга хизмат кўрсатиши мумкин.

PowerX - бу батарея ишлаб чиқариш бўйича стартап. Компания асосчилари тоза энергиядан фойдаланиш ва узатиш усулларини ўзгартирмоқчи, шунингдек, уни бутун дунёга тарқатмоқчи.