Россияда Украинага қарши урушда қатнашган абитуриентларга қўшимча балл бериш таклиф этилди

Маълум бўлишича, Украинадаги урушда вафот этган ёки яраланган ҳарбийлар, амалдорлар ва давлат хизматчиларининг фарзандлари ОТМга кириш имтиҳонларисиз ўқишга қабул қилинади.

Фото: Сергей Пятаков / РИА Новости

Россия таълим ва фан вазирлиги томонидан мамлакатдаги олий таълим муассасаларига юборилган тавсияномада Укранидаги урушда кўнгилли сифатида қатнашган шартнома асосидаги ҳарбий хизматчилар, муддатли ҳарбий хизмат аскарлари ёхуд оммавий сафарбарлик асосида Қуролли Кучларга жалб қилинган абитуриентларга қўшимча балл беришлари кераклиги ҳақида сўз боради. Бу ҳақда «РБК» хабар бермоқда.

“Абитуриентнинг шахсий ютуқлари, жумладан, ҳарбий хизматни ўтагани ва кўнгиллилар таркибига кирганлиги учун бериладиган баллар йиғиндиси 10 баллдан ошмаслиги керак”, – дейилади вазирлик хабарида.

Бир ой олдин Россия таълим ва фан вазирлиги олий таълим муассасаларига Украинадаги жангларда иштирок этган талабалар ёки уларнинг оила аъзолари учун таълим харажатларини камайтириш, шунингдек, уларга моддий ёрдам кўрсатишни тавсия қилган эди. “Уларга биринчи навбатда ётоқхоналардан жой бериш керак”, дея қўшимча қилинади Таълим ва фан вазирлиги тавсияномасида.

Бундан ташқари, уруш фахрийси мақомига эга бўлган талабалар давлат ижтимоий стипендияси олиш ҳуқуқига эга бўлиб, ушбу стипендия ОТМдаги таълим сўнгига қадар тўланади. Шунингдек, ОАВнинг ёзишича, Миллий тадқиқот университети Олий иқтисодиёт мактаби уруш қатнашчилари, уларнинг фарзандлари ва яқин қариндошларини бепул ўқитишга ваъда берган.

Май ойидан бошлаб Украинадаги махсус ҳарбий операция иштирокчиларининг фарзандлари Россия университетларига махсус квота бўйича кириш ҳуқуқини олишди – таълим муассасалари уларга бакалавриат ва мутахассислик дастурларига абитуриентлар учун умумий ўринларнинг 10 фоизини ажратишлари шарт.

Шу билан бирга, Россиядаги университет ҳамда институтлар ҳарбий хизматчилар ва ижро этувчи ҳокимият органлари, ҳарбий хизматни ўтаётган давлат органлари ходимларининг фарзандларини (агар улар Украинадаги урушда вафот этган ёки яраланган бўлса) кириш имтиҳонларисиз (ижодий ёки касбий тестлар бундан мустасно) ўқишга қабул қилишлари шарт. Агар юқоридаги тоифадаги уруш қатнашчилари махсус ҳарбий операция чоғида тирик қолган ва жароҳатланмаган бўлса, уларнинг фарзандлари кириш имтиҳонлари натижалари бўйича ўқишга қабул қилиниши белгиланган.

«Коммерсантъ» нашри ўтган йилнинг ёзида махсус квота бўйича ОТМга ўқишга кирган Украинадаги уруш қатнашчилари фарзандларининг маълумотлари махфийлаштирилганини аниқлаганди.