Одессадаги вайронгарчиликлар ва фронтдаги жангчилар. Уруш суратлари

Украинадаги урушнинг 515-куни ўтди. Асосий маълумотлар:

• Россия Одесса бўйлаб ракета зарбалари йўллади. Шаҳардаги йирик Спасо-Преображенский собори вайрон бўлган, 25 та архитектура ёдгорлиги шикастланган. Тинч аҳоли вакилларидан бир киши ҳалок бўлиб, 21 киши яраланган (жумладан, тўрт нафар бола ҳам).
• РФ мудофаа вазирлиги Одесса ўққа тутилганини тасдиқлади, аммо Спасо-Преображенский собори «украинларнинг ҳаво ҳужумидан мудофаа кучлари операторларининг билимсизларча ҳаракатлари» туфайли вайрон бўлганини билдирган.
• Александр Лукашенко Петербургда Владимир Путин билан учрашувда Беларусга жойлаштирилган «Вагнер» ХҲК жангчилари уни «асабийлаштира бошлагани», улар «Варшавага экскурсияга бориш»ни хоҳлаётганини айтди.
• Харкив областида россияликларнинг Луҳанск области билан чегарадаги Кучеровка қишлоғига йўллаган авиазарбаси оқибатида 70 ёшли аёл жароҳат олди.

Одесса бўйлаб ракета зарбаси

23 июл куни Россия қўшини Одессани ўққа тутди. Порт инфратузилмаси, камида олтита турар жой биноси, шунингдек ўнлаб автомобиллар зарба остида қолган. Бундан ташқари, шаҳарда 25 та архитектура ёдгорлиги шикастланган, Одессадаги энг йирик православ ибодатхонаси, Москва патриархатининг Украина православ черковига мансуб бўлган Спасо-Преображенский кафедрал собори — вайрон бўлган.

Ҳужум вақтида тинч аҳоли вакилларидан бир киши ҳалок бўлган, 21 киши жароҳат олган, улар орасида — тўрт нафар бола ҳам бор.

РФ мудофаа вазирлиги зарбалар нишони «РФга қарши экипажсиз катерлар орқали террорчилик актлари тайёрланган объектлар, шунингдек Одессадаги катерлар ишлаб чиқарилган жойлар» бўлганини маълум қилди. «Зарба берилган объектларда хорижлик ёлланма кучлар бўлган. Зарба бериш учун режалаштирилган барча нишонлар йўқ қилинди», — дейилган вазирлик хабарида ва Спасо-Преображенский собори «украинларнинг ҳаво ҳужумидан мудофаа кучлари операторларининг билимсизларча ҳаракатлари» туфайли вайрон бўлгани қўшимча қилинган.

Одесса мэри Геннадий Труханов ўз видеомурожаатида шаҳарда россияликлардан «нафақат нафратланишлари, балки ҳазар қилишлари»ни айтган. «Сиз бизни синдира олмайсиз, фақат янада ғазаблантирасиз. Ҳимоячиларимизнинг кучи, оддий одамлар дарди ва ғазабининг ортиши сиз учун ҳукм бўлади», — дея қайд этган мэр. Володимир Зеленский эса «россиялик террорчиларга Одесса учун албатта жавоб қайтарилиши»ни ваъда қилган.

Константиновка ўққа тутилиши оқибатлари

22 июлга ўтар кечаси РФ армияси Донецк областининг Константиновка шаҳрига зарба йўллади. Област ҳарбий маъмуриятига кўра, ҳужум вақтида оилавий жуфтлик ҳалок бўлган. Осколкалар ва зарб тўлқини 20 га яқин хусусий уйлар, мактаб биноси ва газ қувурига зарар етказган.

Донецк областидаги украин ҳарбийлари

Фронтнинг турли чеккаларидан суратлар