Россия ва Украинада дронлар ҳужуми. Уруш суратлари

Украинадаги урушнинг 516-куни ўтди. Асосий маълумотлар:

• Москвага дронлар ҳужум қилди. Иккита учувчисиз учар қурилма Комсомольский ва Лихачев проспектларидаги нотурар жойларга қулаган. Учинчиси — Зеленоград округида. Ҳеч ким жабрланмаган. Кремл ҳужумда Украинани айблади, Киевда бу ҳодисага алоқадорлик расман тасдиқланмади. Украин нашрлари маълумотига кўра, ҳужум Украина мудофаа вазирлиги бош разведка бошқармасининг махсус амалиёти бўлган.
• Владимир Путин захирада бўлиш ёшини 5 йилга ошириш тўғрисидаги қонунни имзолади.
• Аннексия қилинган Қримда дронлар Жанкўй районидаги ўқ-дори омборига ҳужум қилгани ҳақида хабар берилди. РФ мудофаа вазирлиги 17 дрон уриб туширилганини маълум қилган.
• Одесса области камикадзе дронлар ҳужумига дучор бўлди. Украина қуролли кучлари маълумотига кўра, ҳужум нишони Дунай порт инфратузилмаси бўлган. Россия томони ҳодиса юзасидан изоҳ бермади.

Москвада дронлар ҳужуми оқибатлари

24 июлга ўтар кечаси Москвага дронлар ҳужум уюштирди. Шаҳар мэри Сергей Собяниннинг маълум қилишича, дронлар шаҳар марказининг жануби-ғарбий қисмидаги иккита нотурар жойга урилган. Жабрланганлар йўқ. Bellingcat тадқиқотчиси Христо Грозевнинг маълумотига кўра, Комсомольский проспектида дрон қулаган нуқта атрофида ҳарбий объектлар жойлашган.

РФ мудофаа вазирлиги дронлар радиоэлектрон кураш воситалари орқали ишдан чиқарилганини маълум қилиб, ҳужумда Украинани айблади. Киев Москвага қилинган ҳужум юзасидан расмий изоҳ бермади, аммо украин нашрлари маълумотига кўра, Украина мудофаа вазирлиги Бош разведка бошқармаси бу ҳужумга алоқадор бўлган.

Одесса дон омборидаги вайронгарчилик

24 июлга ўтар кечаси Одесса областига дронлар ҳужум уюштирди. Украина қуролли кучлари маълумотига кўра, уларнинг мақсади Дунай порт инфратузилмаси бўлган. Одессадан 70 километр шимоли-ғарбда жойлашган Павловка посёлкасида ғалла сақланган ангар, шунингдек бошқа турдаги  юкларнинг резервуарлари шикастланган. Ҳужум вақтида порт ходимларидан олти нафари жароҳатланган. 

Донецк областидаги украин жангчилари