«Яндекс» асосчиси Волож Украинадаги ҳарбий ҳаракатларга қарши чиқди

«Яндекс» асосчиси Аркадий Волож биринчи марта Россиянинг Украинадаги «махсус ҳарбий операцияси» ҳақида гапирди. Унинг баёнотини Forbes нашрига тадбиркорнинг матбуот хизмати тақдим этган. 

«Ўтган йил давомида менга жуда кўп саволлар берилди ва айниқса, уларнинг кўпи шу ҳафтада пайдо бўлди. Мен ўз позициямга ойдинлик киритмоқчиман», — деди тадбиркор. Шу ҳафта бошида ОАВ Волож ўз веб-сайтида Россияни таржимаи ҳолидан олиб ташлаганини пайқаганди. Эндиликда у ерда айтилишича, Волож — «Қозоғистонда туғилган исроиллик технологик тадбиркор». 

Волож «дўстлари ва қариндошлари яшаётган» Украинадаги «махсус операция»га «қатъий қарши» эканлигини айтди. «Украиналикларнинг уйларига ҳар куни бомбалар учиб келаётгани мени даҳшатга солмоқда. 2014 йилдан бери мен Россияда яшамаган бўлсам ҳам, мамлакат ҳаракатлари учун менинг ҳам масъулиятим борлигини тушунаман», деди тадбиркор. Аввалроқ Россия Мудофаа вазирлиги фуқаролик инфратузилмасига ҳужум қилмаётганини бир неча бор таъкидлаганди. 

«Яндекс» яратувчилари, Воложнинг сўзларига кўра, «янги Россия - очиқ, илғор, жаҳон иқтисодиётига интеграциялашган давлат» қуриляпти деб ишонган. Бироқ, вақт ўтиши билан Россия «глобал дунёнинг бир қисми бўлишга шошилмаётгани» маълум бўлди ва «Яндекс»га расмийлар томонидан босим кучайган. 

2014 йилда Волож Исроилга кўчиб ўтди ва у ерда компаниянинг халқаро лойиҳаларини ишлаб чиқишда иштирок этди, бироқ 2022 йил февралида «дунё ўзгарди ва мен «Яндекс» билан бўлган ҳикоям тугаганини англадим», дея ўз фикри билан ўртоқлашган тадбиркор. Шундан сўнг у «мамлакатни тарк этиб, янги ҳаёт бошлашга қарор қилган иқтидорли россиялик муҳандисларни қўллаб-қувватлашга эътибор қаратди», дейилади баёнотда. 

Волож Россиянинг Украинадаги ҳаракатлари ҳақида гапирмаганига «кўп сабаблар» борлигини таъкидлаб ўтди, аммо улар қандай эканини очиқламади. «Сиз менинг баёнотимнинг долзарблиги ҳақида баҳслашишингиз мумкин, лекин унинг моҳияти ҳақида эмас», - дея хулоса қилди тадбиркор. 

Аркадий Волож 2000 йилда Иля Сегалович билан биргаликда «Яндекс» компаниясига асос солган. Сегалович 2013 йилда вафот этган. 2022 йилда Волож Европа Иттифоқининг санкциялари остида қолди, шундан сўнг «Яндекс»даги барча постларини тарк этди. 2022 йил март ойида Волож доллардаги миллиардер мақомини йўқотди. 

2022 йил ноябрь ойида «Яндекс» бизнесни бошқариш тузилмасини ўзгартириш ва активларни бўлиш ҳақидаги тахминий ниятини эълон қилди. Россия бизнеси алоҳида компаниялар гуруҳига бўлинади, улардан Нидерландиянинг Yandex N.V. ажралиб чиқиб, ўз номини ўзгартиради. Ўтган йилнинг охирида Волож «Яндекс» ходимлари билан хайрлашиб, «Яндекс ҳолдингидан ташқарида ривожланиши мумкин бўлган тўртта халқаро стартапга маслаҳат беришдан манфаатдор эканлигини» таъкидлади.

«Яндекс» матбуот хизмати Forbes’га маълум қилишича, реструктуризация жараёни ҳали якунланмаган. Ширкат компанияни тарк этган Воложнинг шахсий баёнотига изоҳ беришнинг иложи йўқ деб ҳисоблашини қўшимча қилди.