Швецияда «ГРУ»га ишлаганликда гумонланган россияликка жосуслик айблови қўйилди

Асли россиялик Швеция фуқароси Сергей Скворцовга ўн йил давомида Россия ҳарбий разведкаси учун маълумот тўплаш айблови қўйилди. Швеция прокуратурасининг 28 август, душанба куни маълум қилишича, 60 ёшли Скворцов «Швеция ва хорижий давлатга қарши йирик миқёсдаги ноқонуний разведка фаолиятида» айбланмоқда.

Скворцов ва унинг рафиқаси ўтган йил ноябр ойида Стокҳолм чеккасида полиция махсус кучлари томонидан қўлга олинган эди. Швеция матбуотига кўра, операцияга иккита Black Hawk вертолёти жалб қилинган. Скворцов ушланганидан бери ҳибсда сақланмоқда. У ўз айбини рад этяпти. Унинг рафиқаси суриштирувдан сўнг ҳеч қандай айбловсиз қўйиб юборилган. 

Россия ҳарбий разведкаси учун жосуслик 

AP агентлиги айблов хулосасининг нусхасини келтирди, унда айтилишича, Скворцов 2014 йил 1 июлдан 2022 йил ноябригача «махфий ва фирибгарлик воситаларидан фойдаланган ҳолда Россия давлати манфаатлари йўлида маълумот олиш мақсадида фаолият олиб борган, бу хорижий куч Швеция учун хавф яратиши мумкин бўлган». 

Прокурорларга кўра, Скворцов ўзининг импорт-экспорт бизнесидан ноқонуний равишда маълумот олиш ва «ГРУ»га топшириш учун фойдаланган. Шунингдек, у «Россия давлати ва ҳарбийлари учун санкциялар туфайли очиқ бозорда олиш имкони бўлмаган турли буюмлар»ни қандай олиш мумкинлиги ҳақидаги маълумотларни тўплаган. 

Сергей Скворцов Швецияда 25 йилдан бери яшаб келган. 2012 йилда у Швеция фуқаролигини олди. Унинг суд жараёни 4 сентябрда бошланади. Гувоҳлардан бири сифатида Скворцовнинг фаолияти АҚШ хавфсизлигига қандай таҳдид солгани ва турли Америка компаниялари билан ҳамкорлигини тасдиқлаш учун ФТБ агенти чақирилган.