Россия ҳудудларида сайловлар якунланди

Россияда минтақавий сайловларда овоз бериш якунланди. Дастлабки натижаларга кўра, аксарият ҳолларда амалдаги губернаторлар ёки губернатор вазифасини бажарувчи шахслар 70-80 фоиздан кўпроқ овоз тўплаб, минтақа раҳбарлари учун сайловларда ғалаба қозонди.

Бундай натижалар, хусусан, Москва, Самара, Нижний Новгород, Псков, Орел, Воронеж, Кемерово, Омск, Магадан вилоятлари, Приморск ва Красноярск ўлкалари, Чукотка автоном округи ва Ёқутистонда қайд этилган. 

Москвада электрон овоз бериш натижаларига кўра, Сергей Собянин 77,05 фоиздан кўпроқ овоз тўплаган ҳолда ғалаба қозонди. Сайлов участкаларида бюллетенларни санаш давом этмоқда, бироқ Марказий сайлов комиссияси раҳбари ўринбосари Николай Булаев амалдаги мэрни сайловдаги ғалабаси билан табриклаган. Россия пойтахтида сайловчиларнинг умумий иштироки 42,5 фоизни ташкил этди. 

Россияда сайлов қонунчилиги бузилиши 

Находкада Приморск ўлкаси губернатори сайловида овоз бериш бутунлай сохталаштирилган бўлиши мумкин, дейди «Голос» ҳаракатининг собиқ ҳамраиси Роман Удот. У сайловчиларнинг иштироки бўйича статистик маълумотларни таҳлил қилиб, шаҳарнинг барча ҳудудлари бир вақтнинг ўзида бир хил кўрсаткичларга эришганини аниқлади. Мутахассис фикрича, бу кўрсаткич расмий сайловчиларнинг ҳақиқий сонига алоқаси йўқлигини англатади. 

Геленжикда икки нафар мустақил кузатувчига сайлов участкаларида ҳарбий комиссарликка бориш тўғрисида чақирув қоғози берилди. Москвада 8 сентябр куни Россия Коммунистик партиясидан Давлат думаси депутати Сергей Обухов сайлов участкасидан бюллетенлар хавфсиз қопларда алмаштирилаётгани акс этган видеони эълон қилганидан кейин 1246-сонли участкада бюллетенлар бекор қилингани ҳақида хабар берилди. Худди шундай айбловлар Иваново вилоятининг Шуя шаҳридаги Россия Коммунистик партияси вакиллари томонидан ҳам айтилди. Олтой ўлкасида сайлов участкаларидан бирида комиссия аъзолари овоз бериш тугашига икки соат қолганда сейф-пакетлардаги сайлов бюллетенлари сони тўғрисида далолатнома тайёрлаган, деб ёзади «Голос». 

Эгаллаб олинган ҳудудлардаги «сайловлар»да «Ягона Россия» ғалаба қозонди

Россия «сайловлари» Украинанинг эгаллаб олинган ҳудудларида ҳам бўлиб ўтди. Европа Иттифоқи уларни «халқаро ҳуқуқ ва Украина суверенитетининг навбатдаги қўпол бузилиши» деб атади. Германия Ташқи ишлар вазирлиги бу «сайлов симуляцияси» эканлигини билдирди. АҚШ давлат котиби Энтони Блинкен Вашингтон ҳеч қачон Россиянинг Украина суверен ҳудудига бўлган даъволарини тан олмаслигини ва бундай «ноқонуний овоз бериш»ни қўллаб-қувватлаганларга нисбатан санкциялар қўлланишини айтди. «Кремл бу олдиндан белгиланган натижалар Россиянинг Украина қисмларига нисбатан ноқонуний даъволарини кучайтиради, деб умид қилмоқда, аммо бу ташвиқот тадбиридан бошқа нарса эмас», деди у. 

Херсон вилоятининг эгаллаб олинган ҳудудларида маҳаллий «сайлов комиссияси» «Ягона Россия» 74,86 фоиз овоз билан ғалаба қозонганини эълон қилди. «Запорижжя Қонунчилик йиғинига сайловлар»да «Ягона Россия» 83,01 фоиз, «ЛХР»да - 74,42 фоиз, «ДХР»да - 78,03 фоиз овоз олди.