Россияда чет элликларни миграция рўйхатидан ўтказиш қоидалари ўзгартирилди

Энди чет элликлар Россияга келгани ҳақида ички ишлар органларини ўзи хабардор қилиши мумкин.

Фото: Известия

Россия ҳукумати чет элликлар ва фуқаролиги бўлмаган шахсларни миграция рўйхатидан ўтказиш қоидаларига ўзгартиришлар киритди. Бу ҳақда тегишли фармонга таяниб, ТАСС хабар берди.

Янгиликка кўра, хорижликлар Россияга келгани тўғрисида мустақил равишда ички ишлар органларини хабардор қилиши мумкин бўлади. Илгари буни фақат уларни қабул қилувчи томон амалга ошириши мумкин эди.

Чет эл фуқароси Россияга келганида ҳужжатларни бевосита Ички ишлар вазирлигининг ҳудудий органига топшириши ёки давлат хизматлари порталидан фойдаланган ҳолда онлайн юбориши мумкин.

Шу билан бирга, «электрон» вариантда чет эл фуқаросининг ўзи ва у яшайдиган квартира эгаси Давлат хизматлари порталида шахсий кабинетга эга бўлиши шарт. Бундай ҳолда, чет эл фуқароси яшаш учун квартира эгасидан розилик олиши ва бу ҳақдаги файлни хабарномага илова қилиши керак.

Шунингдек, уйни ижарага олиш ҳақида шартномага эга бўлган чет эллик ҳам Ички ишлар вазирлигига мустақил равишда хабарнома бериши мумкин. Бунда ижара шартномасини илова қилиш керак бўлади.

Агар чет эл фуқароси виза олиши керак бўлса, Россияга келгани тўғрисида фақат бир шарт билан хабарнома бериши мумкин: у таклифномада кўрсатилган манзилда яшаши шарт.