Зеленский: Москвада «Майдан-3» режаси ишлаб чиқилаётган бўлиши мумкин

Украина президенти Володимир Зеленский Россия ҳукумати Украинадаги вазиятни беқарорлаштириш кампаниясини фаол тайёрлаётганини, унинг асосий мақсади Украина ҳукуматини ағдариш ва мамлакатда давлат тўнтаришини амалга ошириш эканини айтди. Бу ҳақда у 16 ноябр куни кечқурун Bloomberg агентлигига берган интервюсида маълум қилди.

«Бизнинг разведка ҳамкорларимиздан олинган маълумотларга эга», деди Зеленский ва ички «Майдан-3» деб номланган дезинформация режаси ҳақида гапирди - 2004 ва 2014 йилларда халқ исёнлари маркази бўлган Киевнинг марказий майдони Майдан деб аталади. Иккинчиси Россия томонидан қўллаб-қувватланган президент Виктор Януковичнинг ағдарилишида муҳим рол ўйнаган, бунинг натижасида Украина Қрими ва Донбасснинг бир қисми Россия томонидан эгаллаб олинди. 

«Майдан улар учун - тўнтариш, шунинг учун операцияни тушуниш мумкин», - дея қўшимча қилди президент. Россия раҳбарияти билан музокаралардан бош тортган Зеленский унинг ҳукумати можаронинг «музлатилишига» олиб келиши мумкин бўлган ҳеч қандай чора кўрмаслигини айтди. 

Аваков разведка маълумотларига муносабат билдирди 

2014 йилдан 2021 йилгача тегишли лавозимда ишлаган Украина собиқ ички ишлар вазири Арсен Аваков 17 ноябр куни Telegram’да Украина жамиятида бўлиниш юз бермаслигини маълум қилиб, Москвага мурожаат қилди. «Буни кутишни ҳожати йўқ, - деб ёзади у. - Агрессия, барча қийинчилик ва синовлар олдида биз, украиналиклар, бирдам бўламиз! Президентдан тортиб аскаргача бирга. Бу - бизнинг кучимиз!» 

Аввалроқ Online.ua нашри Украина хавфсизлик кучларидаги манбаларига таяниб, Украинадаги вазиятни беқарорлаштириш мақсадидаги кенг кўламли «Майдан-3» ахборот ҳужуми ҳақида эслаб ўтган эди. Нашрнинг ёзишича, Россия махсус хизматларининг ахборот кампанияси 2023 йил ноябр-декабр ойларига мўлжалланган. Шунингдек, материалда айтилишича, операция куратори - Кремл сиёсий блоки раҳбари Сергей Кириенко, мафкурачи эса Россия президентининг собиқ ёрдамчиси - Владислав Сурков. 

Украина ҳукуматидаги бўлиниш ҳақида гап-сўзлар

Ноябр ойи бошида The Economist газетаси Украина Қуролли кучлари бош қўмондони Валерий Залужний билан интервюни эълон қилди, унда у фронтдаги вазият боши берк кўчага кириб қолганини айтди. Кўп ўтмай, президент Зеленский Залужнийнинг баёнотларини очиқчасига инкор этди, шунинг учун баъзи оммавий ахборот воситалари, шу жумладан The New York Times Украина раҳбариятидаги бўлиниш ҳақида ёзишни бошлади. Украина расмийларининг ўзи буни рад этяпти. 

Шу билан бирга, уруш вақтида катта шуҳрат қозонган Украина президенти собиқ маслаҳатчиси Алексей Арестович президентлик сайловларида қатнашиш нияти борлигини маълум қилди. У ўзининг сайловолди дастурини тақдим этди, унга кўра Украина Қуролли кучлари мудофаага ўтади ва Украина НАТОга киришни талаб қилиб, алянсга қўшилиш вақтида эгаллаб олинган ҳудудларни қайтармаслик мажбуриятини олади. 

Украинада 2024 йилда президентлик сайловларини ўтказиш тўғрисидаги қарор ҳали қабул қилинмаган. Зеленскийнинг ўзи аввалроқ «ҳозир сайлов ўтказиш вақти эмас» дея баёнот берган эди.