«Қирғизистонни Райим ва Женго эмас, президент бошқаради» — Ташиев уюшган жиноятчиликка қарши курашни кучайтиришни ваъда қилди

Қамчибек Ташиев Қирғизистонни хавфсиз ва демократик мамлакатга айлантириш бош вазифа эканини таъкидлаган.

«Уюшган жиноий гуруҳларга қарши кураш чоғида ходимларимиз ўз мажбуриятларини бажаришмоқда. Биз бюджетга 1 млрд 200 млн доллар маблағни қайтардик», — деган Ташиев.

Қирғизистон МХДҚ раиси жиноятчилар ин қурган масканлар ҳам аниқланаётганини қайд этган. Кечанинг ўзида Қамчи Қўлбоевнинг яна 10 миллион долларлик бойлиги аниқланган.

«Масалан, «Ай-Пери» биноси гўзаллик салони сифатида таниш, бироқ у ерда бандитлар ўзига клуб ясаб олишган. Биз уни давлат ҳисобига қайтардик. Тошкўмирда ҳам бандитлар ҳукмронлик қилишган, уни ҳам қайтардик. Кечанинг ўзида Қамчи Қўлбоевнинг яна 10 млн доллар маблағини аниқладик. Улар ўз ихтиёри билан маблағни давлатга қайтаришди. Бунгача 15 млн ва 12 млн доллар қайтаришган эди», — деган Ташиев.

Ташиевга кўра, катта компанияларда бандитларнинг улуши бўлган. Улар ўз улушларидан воз кечиб, пулни давлатга қайтаришмоқда.

«Биз бир тийинини ҳам ўзимизга олмаймиз. Ҳаммаси давлатга топширилади. Яъни, биз — МХДҚдагилар бир сўмни ҳам тасарруф этмаймиз. Биз фақат статистикага жавоб берамиз. Ходимларга буюрилган: қайтарилган барча маблағлар бюджетга топширилади. Бир сўмга ҳам тегинилмайди. Ходимлар шундай топшириқни бажаришмоқда», — деган Қирғизистон МХДҚ раҳбари.

Ташиев уюшган жиноятчиликка қарши муросасиз кураш давом эттирилишини таъкидлади. Унинг сўзларига кўра, Женго лақабли криминал авторитет Қодир Дўсўнов ўғри мафкурасидан тонган бўлса ҳам, «ўз жиноятларини давом эттирмоқда».

«Уюшган жиноятчиликка қарши кураш янада кескинлашади. Мен Женгони олиб ташладим. У ўғрилик фаолиятидан воз кечишини айтган эди, лекин аслида йиғиштиргани йўқ. У фақат экранда воз кечдим, деди. Ҳаётда эски ишларини давом эттирмоқда. Лекин мен унинг уюшган жиноий гуруҳ раҳбари бўлишига йўл қўймайман. Мен бу кунлар келишига икки йил тайёргарлик кўрдим», — деган Ташиев.

Қирғизистон МХДҚ раҳбари уюшган жиноий гуруҳ билан алоқадор ҳар қандай инсонни мансабидан олиб ташлашни ваъда қилди.

«На Райим Матраимов, на Женго, ҳеч ким мамлакатни бошқармайди. Фақат президент бошқаради. Депутатлар, илтимос, бизни қўлланглар. Ҳа, биз ҳам кези келса хатоларга йўл қўямиз. Ишдан олинаётганларнинг барчаси бандитлар билан алоқада бўлган. Мана, менинг олдимга депутатлардан бири келиб, областлардан бирининг раҳбари ишдан олинмаслигини сўради. Мен шундай дейман: у Казак лақабли уюшган жиноий гуруҳ раҳбари билан алоқада бўлган. Ҳоким қамоқхонага у учун жўнатма жўнатган», — деган МХДҚ раиси.

Қамчибек Ташиев Қирғизистонни оилавий кланлар ва коррупциядан тозалаш ниятида эканини ҳам таъкидлаган. У МХДҚнинг уч ходими пора туфайли ишдан бўшатилганини ҳам айтди.

«Куни кеча уч ходимни пора учун ишдан бўшатдим. Улардан бири 23 минг доллар пора олган, иккинчиси инвесторга 82 минг доллар беришда ёрдам берган. Ўринбосарларимга ҳайфсан эълон қилдим, бу ҳолат яна такрорланса ишдан бўшатилиши ҳақида огоҳлантирдим. Бизнинг ҳаракатларимиз фақат юрт равнақи учун йўналтирилган», — деган Ташиев.

Эслатиб ўтамиз, 2023 йилнинг 4 октябр куни Бишкекда ўтазилган махсус операция мобайнида криминал авторитет Қамчи Қўлбоев отиб ўлдирилган эди. Қўлбоевнинг ўлимидан сўнг бир неча криминал авторитетлар ва уюшган жиноий гуруҳ аъзолари жиноят фаолият ва криминал статусдан воз кечганини эълон қилишди. Шунингдек, МХДҚ жиноий гуруҳларни молиялаштирган 30 кишини ҳибсга олган. Уларнинг орасида машҳур бизнесменлар ҳам бор.