Ринкевичс Путиннинг Латвия ҳақидаги гапларини «қўрқитиш» деб атади

Латвия президенти Эдгарс Ринкевичс Латвия ҳукумати русийзабон аҳолига нисбатан ёмон муносабатда бўлаётганини эълон қилган Россия президенти Владимир Путиннинг гапларини «қўрқитиш сиёсати» деб атади. «Бу уларнинг барча фуқаролари ёки «рус дунёси» вакиллари (бошқа мамлакатларда) шафқатсизларча масхара қилинаётгани ҳақидаги рус пропагандасининг одатий ҳикоясидир», деди Ринкевичс 6 декабр, чоршанба куни Neatkariga Rita Avize газетасига. Унинг сўзларига кўра, аслида шу йўл билан «улар эътиборни Россия Украинада содир этаётган нарсалардан чалғитмоқчи». 

4 декабр куни президент ҳузуридаги Инсон ҳуқуқлари бўйича кенгаш аъзолари билан учрашувда Путин Латвия ҳукуматини русийзабон аҳолига нисбатан ёмон муносабатда бўлишда айблади ва бу Латвия учун салбий оқибатларга олиб келиши мумкинлиги ҳақида гапирди. «У ёки бу давлатда яшашни истаган, у ерда ишлаб, шу давлатга қандайдир фойдаси теккан одамларга нисбатан шундай сиёсат олиб боришса, уларга ёмон муносабатда бўлишса, охир-оқибат уларнинг ўзларига мамлакатда шундай муносабат пайдо бўлади», - деди у. 

Латвияда яшовчи россияликлар тил имтиҳонини топшириши керак 

Сентябр ойи ўрталарида Латвияда иммиграция қонунчилигига киритилган ўзгартиришлар кучга кирди, унга кўра, мамлакатда яшовчи Россия фуқаролари Европа Иттифоқида доимий резидент сифатида янги мақомини олиш учун икки йил ичида латиш тили имтиҳонидан ўтиши керак. Бу вақт мобайнида уларга чекланмаган меҳнат ҳуқуқи ва давлат хизматлари, жумладан, пенсия ва нафақалар олиш ҳуқуқига эга бўлган вақтинчалик яшаш учун рухсатнома берилади. 

Латвия расмийларига кўра, янги қоидалар 25 минг кишига тегишли. Латвия тили имтиҳонига ёзилмаган ва доимий яшаш учун рухсатномани узайтириш учун ҳужжатларни тақдим этмаган россияликлар тез орада уч ой ичида мамлакатни тарк этишни талаб қилувчи хат олиши мумкин. Хат тахминан 6000 кишига юборилиши эҳтимоли бор.