Туркия футболида яна можаро. Клуб президенти жамоани майдондан олиб чиқиб кетди

У ҳакамдан фол ишлатилган ҳужумда урилган гол инобатга олинганидан норози бўлган.

Туркияда ўтган ҳафтадан буён можаро ортидан можаро рўй бермоқда. 11 декабр куни «Анқарагужу» президенти Фарук Хўжа арбитр Халил Мелерни калтаклаганди — у жамоаси «Ризеспор»га қарши ўйиннинг 97-дақиқасида ғалабани қўлдан чиқарганига чидай олмаганди, ўшанда рефери ўйин давомида пойтахт жамоасининг бир голини бекор қилган ва бир футболчисини майдондан четлатганди.

Мелер жиддий жабрланганди — кўзи шишиб кетган ҳакамни шифохонага олиб боришган ва у ўша ерда ҳакамлик фаолиятини якунлашга ваъда берганди. Фарук Хўжа ҳам муаммоларга дучор бўлган — у лавозими, партиядаги ўрнини (у сиёсатчи) амалда йўқотди. Вазият Эрдўғангача етиб борди — президент турк спортида зўравонликка ўрин йўқлигини айтди ва чемпионат вақтинча тўхтатиб турилди.

Турнир қайта старт олиши билан — янги можаро рўй берди. «Истанбулспор» ва «Трабзонспор» ўйинининг 74-дақиқасида, таблода ҳисоб 1:2 ҳолатида мезбонлар клуби президенти жамоани майдондан олиб кетди. У ҳамкасбидан фарқли ўлароқ, реферини калтакламади, аммо ўйинни бузди ва ўйин бекор қилинди. «Трабзонспор» президенти Эртуғрул Доған ҳамкасбининг ҳаракати юзасидан шундай деган: «У менга ўгирилиб қаради ва деди: «Кечиринг, гап сизда эмас, мен ортиқ тоқат қила олмайман». Масала фақат шу ўйин билан боғлиқ деб ўйламайман».

Акмал Фаик Сариолиўғлида («Истанбулспор» президенти) бундай радикал қарор учун сабаб бормиди? Қисман ҳа — «Трабзонспор» 68-дақиқадаги иккинчи голини, катта эҳтимол билан фолдан кейин урди. Рақиб ҳужумчиси Пол Онуачунинг голидан бироз аввал қўполлик кузатилган, ҳакам эса эътибор қаратмаганди.

Бу вазиятда «Истанбулспор» футболчиларининг барчаси ва мураббийлар бу гол бекор қилиниши кераклигини талаб қилишганди. Президент эса улардан ҳам ўтиб тушди — жамоани майдондан олиб чиқиб кетишга қарор қилди.

Шу билан бирга барча футболчилар ҳам кетишни исташмади. «Истанбулспор» ҳимоячиси Симон Дели эса президент қаршисида тиз чўкиб қарорини қайтариб олишни сўради — аммо бу ёрдам бермади. Сариолиўғли барибир барчани кийим алмаштириш хонасига олиб кетди.

Клуб энди камида очколардан маҳрум этилиши ва жаримага тортилиши мумкин. Қоидабузарлик такрорланган ҳолатда эса «Истанбулспор» автоматик равишда қуйи лигага тушиб кетади. Лекин жамоа шусиз ҳам ҳозирда 15 турда 8 очко жамғарган ҳолда турнир жадвалининг сўнгги ўрнида жойлашган.

Эслатиб ўтамиз, бунгача Туркия Суперлигаси 15-туридан ўрин олган «Анкарагужу» — «Ризеспор» ўйинидан сўнг (1:1) мезбонлар президенти Фарук Кожа ҳакам Халил Умутга мушт туширган. Унинг ортидан яна 2 киши ҳакамни тепкилаганди.