Сербияда намойишчилар Белград кўчаларини тўсиб қўймоқчи

Сербия мухолифати парламент сайловлари натижаларини бекор қилишни ва янгидан ўтказишни талаб қилмоқда. Намойишчилар пойтахт кўчаларини бир кун давомида тўсиб қўйишини эълон қилди.

Фото: AFP

Сербияда парламент сайловлари натижаларига қарши намойишчилар пойтахт Белградда транспорт ҳаракатини фалаж қилиш билан таҳдид солмоқда. 27 декабр, чоршанба куни Белград университети биноси олдидаги навбатдаги митингда фаол Иван Биелич: «Биз жума куни 24 соатлик блокада эълон қиламиз», деди. Намойишчилар 29 декабр, жума куни тушдан бошлаб кўчаларда ҳаракатни бутунлай тўсиб қўйиш ва фақат шанба кунги норозилик акцияси учун йўлларни тозалаш ниятида.

Чоршанба куни Белград университетининг фалсафа факултети олдида ўтказилган митингда бир неча юз киши – асосан «Кураш» норозилик ҳаракати аъзосидан талабалар иштирок этди, деб хабар бермоқда AFP.

30 декабр, шанба куни Марказий сайлов комиссияси 30 та сайлов участкасида қайта овоз беришни белгилади. Бироқ намойишчилар бундан қаноатлангани йўқ – улар сайлов натижалари бутунлай бекор қилиниб, янгидан ўтказилишини талаб қилмоқда.

Сайловда Вучичнинг партияси ғалаба қозонди

Сербияда 17 декабр куни бўлиб ўтган парламент сайловлари ортидан норозилик намойишлари давом этмоқда. Президент Вучичнинг ҳукмрон ўнг қанот популист Сербия прогрессив партияси (SNS) Халқ ассамблеясига (бир палатали парламент) сайловларда қарийб 47 фоиз овоз билан ғалаба қозонди. Мухолифатдаги «Зўравонликка қарши Сербия» 23 фоиз тўплаган.

Эртаси куни Европада хавфсизлик ва ҳамкорлик ташкилоти, Европа Иттифоқи парламенти ва Европа кенгаши вакилларидан иборат халқаро кузатувчилар миссияси сайлов участкаларида қатор қонунбузарликлар, хусусан, зўравонлик, овозларни сотиб олиш ва сохта сайлов бюллетенларини ташлаш ҳолатлари ҳақида хабар берди. Вучич сохталаштириш бўйича айбловларни рад этяпти.

Сербия мухолифатининг норозилик акцияси

Овоз беришнинг эртасига, 18 декабр оқшомида Сербия мухолифатининг минглаб тарафдорлари Белградда эҳтимолий сохталаштиришларга қарши норозилик намойиши ўтказди. Социал-демократик эркинлик ва адолат партияси вице-президенти Мариника Тепич ва яна бир қанча фаоллар Белграддаги сайлов натижалари бекор қилинмагунча муддатсиз очлик эълон қилди.

Норозилик намойишлари 24 декабр, якшанба кунигача тинч давом этди, сўнг юзлаб намойишчилар пойтахт шаҳар маъмурияти биносига бостириб киришга уринди, улардан баъзилари бино ойналарини синдирди. Полиция намойишчиларга қарши кўздан ёш оқизувчи газ ишлатган, ўнлаб одамлар қўлга олинган.