«МЮ» ҳужумчилари гол ура бошлади, Испанияда пешқадам очко йўқотди. Европада кун ўйинлари

«Олд Траффорд»даги учрашув голларга бой бўлди.

«Манчестер Юнайтед» – «Тоттенҳэм» - 2:2
Голлар: 1:0 – 3 Ҳойлунд, 1:1 – 19 Ришарлисон, 2:1 – 40 Рэшфорд, 2:2 – 46 Бентанкур.
«Манчестер Юнайтед» – Онана, Диогу Далот, Эванс (Мартинес, 63), Варан, Уан-Биссака, Антони, Эриксен (Мактоминей, 58), Бруну Фернандеш, Майну, Гарначо, Рэшфорд, Ҳойлунд.
«Тоттенҳэм» – Викарио, Порро, Ромеро, ван де Вен, Удожи, Эмерсон, Ҳейбьерг, Бентанкур, Скипп (Дрэгушин, 85), Жонсон, Вернер (Ҳил, 80), Ришарлисон.
Огоҳлантиришлар: Уан-Биссака (24), Бентанкур (25), Ҳойлунд (45).

АПЛда бешинчи ўрин ҳам ЕЧЛнинг янги мавсуми учун йўлланма бериши деярли аниқ бўлса-да, «Тоттенҳэм» ва «МЮ» топ-4 учун курашишда давом этмоқда. Тен Ҳаг Каземиро, Мартинес ва Шоу тикланиб сафга қайтганини айтганди, аммо улардан ҳеч бири бошланғич таркибдан жой олмади (учинчиси ҳатто заявкага киритилмаган). «Тоттенҳэм»нинг ҳам таркиб борасидаги муаммолари йўқ эмас – Сон Осиё Кубогига, Биссума ва Сарр – Африка Кубогига кетган (манчестерликларда ҳам бошқа қитъа футболчилари етарлича топилади, аммо марокашлик Амрабат асосий таркиб футболчиси эмас, камерунлик Онана эса жамоасининг турнирдаги илк ўйинидан 24 соат олдин клуби учун ўйнаб беришга рози бўлди).

Барча муаммоларга қарамай (балки шундай муаммолар туфайли) биринчи бўлим анча томошабоп кечди. Учинчи дақиқадаёқ Ҳойлунд ҳисобни очди. Даниялик ҳужумчи Англия чемпионатида қаторасига 18 турда голлар ҳисобини оча олмаганди, энди эса қаторасига иккинчи ўйинни голсиз тарк этмайдиган бўлди. Бу сафар у Онана бошлаб берган ҳужум давомида Рэшфорднинг узатмасидан кейин тахминан ўн метр масофадан туриб яқин тўққизликка қайтариб бўлмас зарба йўллади.

«Тоттенҳэм» эса одатдагидек ўз ҳужумкор ўйинини намойиш этишда давом этди. Меҳмонлар кўпроқ вақт давомида тўпга эгалик қилишди ва бурчак зарбасидан кейин ҳисобни тенглаштиришди: Порронинг узатмаси ва Ришарлисоннинг бош билан аниқ зарбаси. Бразилиялик ҳужумчи учун бу сўнгги олти турдаги олтинчи гол бўлди. Ушбу форвард «Тоттенҳэм»га келганидан буён энг яхши формасида бўлиб турибди.

Биринчи бўлим охирларида «МЮ» яна олдинга чиқиб олди. Яна Ҳойлунд билан девор услубида ўйнаган Рэшфорд узоқ бурчакка ерлатиб аниқ зарба берди – 2:1. Бу Маркуснинг жорий мавсумда «Олд Траффорд»да урган биринчи голи бўлди.

«Тоттенҳэм» ўйинда иккинчи бор ҳисобда таъқиб этувчи мақомига тушиб қолди, аммо ўйин тенг эди ва лондонликлар ҳали яна ўз сўзини айтиши табиий эди. Танаффус арафасида Ромеронинг зарбаси тўсинга тегди, танаффусдан кейин эса — «шпорлар» дарҳол гол уришди. Бу сафар Бентанкур ўз номини таблога ёздириб қўйди, унга голли пасни эса бир неча кун олдин жамоага келган Вернер берди. Германиялик ҳужумчи 47 дақиқа ичида 2021/22 йиллар мавсумида «Челси» сафида берган голли узатмалари сонига тенг узатмани амалга оширишга улгурди.

Иккинчи бўлимда эса ёки «шпорлар» қўшишди, ёки «МЮ» суръатни пасайтирди. Ўйиннинг асосий вақтида «Тоттенҳэм» дарвозаси олдида фақат бир хавфли вазият юзага келди, аммо Мактоминейнинг узоқдан йўллаган зарбаси дарвоза устуни ёнидан ўтиб кетди. Лондонликлар учинчи голга максимал даражада яқин келди дейиш қийин эди, аммо Онана дарвозаси томон ҳужумлар етарлича бўлди.

Ўйин барибир 2:2 ҳисобида якунланди, ҳолбуки Мактоминей 90+5-дақиқада ғалаба голини уриши мумкин эди. Шотландиялик яримҳимоячи дарвозабон ҳудудида туриб бош билан йўллаган зарба бироз юқоридан ўтиб кетди. Натижада «Тоттенҳэм» тўпланган очколар сони бўйича «Арсенал»га етиб олди, Артета жамоаси тур ўйинини 20 январ куни «Кристал Пэлас»га қарши ўтказади. Тен Ҳаг ва Постекоглу жамоаси икки ҳафтага яқин давом этадиган қишки таътилга йўл олишди.

Мартинес ЖЧ-2022 финалини эслатди

«Эвертон» – «Астон Вилла» 0:0
«Эвертон» – Пикфорд, Коулмэн, Тарковски, Брэнтуэйт, Миколенко, Дукуре, Харрисон, Гарнер, Онана, Данжума (Макнил, 63), Кэлверт-Льюин (Бету, 63).
«Астон Вилла» – Мартинес, Конса, Диего Карлос (Кэш, 74), Лангле, Морено, Бэйли (Дуран, 64), Макгинн (Дзаньоло, 89), Камара, Дуглас Луис, Диаби (Тилеманс, 64), Уоткинс.
Огоҳлантиришлар: Уоткинс (31), Диего Карлос (48), Тарковски (72), Лангле (73), Тилеманс (75).

Шанба куни «Манчестер Сити» иккинчи ўринга кўтарилиб олганди, бир кун ўтиб эса чемпионлар Шон Дайчдан совға қабул қилиб олишди, унинг бошқарувидаги «Эвертон» «Астон Вилла»ни тўхтатди. Агар Моренонинг голи VAR текширувидан кейин офсайд туфайли бекор қилинмаганида, бирмингҳэмликлар учун барчаси осонроқ кечиши мумкин эди. Танаффус арафасида эса меҳмонлар дуранг ҳисобни базўр сақлаб қолишди ва Эмилиано Мартинес супермен режимини ёқишига тўғри келди. Мезбонларнинг ҳужумларидан бири вақтида у яккама-якка вазиятга чиқиб келган Калверт-Люинни тўхтатиб, барчага ЖЧ-2022 финалини эслатиб қўйди, кейин эса рикошет орқали келган зарбани қайтаришга муваффақ бўлди.

Иккинчи бўлимда «Вилла» куч тежаб ўйнади ва фақат охирги дақиқаларда тўла куч билан олдинга ташланди, аммо икки яхши вазиятдан фойдалана олмади. «Ирислар» дарвозабони Пикфорд бежиз АПЛда қуруқ ўйинлар сони бўйича етакчи эмаслигини (7) кўрсатди. Ҳимоячилар ҳам уялтиришмади ва қийин паллаларда унга ёрдам беришди. Эндиликда Англия чемпионатидаги 97-ўйинида илк бор голсиз дуранг қайд этган Унаи Эмери жамоаси қўшимча кўрсаткичлар бўйича «Ман Сити»дан ортда қолиб, учинчи ўринда жойлашган. Лекин «шаҳарликлар»да ҳам, пешқадам «Ливерпул»да ҳам ва тўртинчи ўринда таъқиб этаётган «Арсенал»да ҳам битта захира ўйини бор.

Испания: «Жирона» аутсайдерга ютқазишига сал қолди

Алмерия – Жирона 0:0
Алмерия – Луиш Машимиану, Пубиль (Рамазани, 68), Монтес (Суарес, 84), Чуми, Акьеме, Аррибас (Кайки, 84), Эдгар Гонсалес (Посо, 63), Робертоне, Лопи, Баптистао, Эмбарба (Мелеро, 69).
Жирона – Гассанига, Ян Коуто (Цыганков, 57), Мартинес, Блинд, Хуанпе, Мигель Гутьеррес, Фернандес (Савио, 67), Алеиш Гарсия, Мартин, Торре (Солис, 57), Довбик (Стуани, 67).
Огоҳлантиришлар: Баптистао (21), Фернандес (34), Акьеме (56), Хуанпе (65), Савио (71), Монтес (79), Кайки (84), Мартинес (90).
Четлатиш: Алеиш Гарсия (80).

«Реал» ва «Барселона» Испания Суперкубоги учун курашаётган маҳалда ла лига доирасида «Жирона» турнир жадвалининг сўнгги поғонасида турган жамоа майдонида жиддий муаммога учради. Биринчи бўлимда «Алмерия» яхшироқ ва фаолроқ ўйнади, каталонияликлар эса ўзига ўхшамасди. Натижада меҳмонлар сафидаги энг яхши футболчи дарвозабон Гассанига бўлди. Ўйиннинг якуний кўрсаткичларидан хулоса қилиш мумкинки, «Жирона»нинг омади келиб очко олган, чемпионатда ҳали бирор марта ғалаба қозона олмаган мезбонлар бир неча бор гол урмаслик қийин бўлган вазиятларда гол ура олмаган. Қолаверса, Мичел Санчес кейинги турда жамоанинг муҳим футболчиларидан бири Алейш Гарсиянинг хизматларидан фойдалана олмайди, у иккинчи бўлимда рақиб яккама-якка вазиятга чиқиб кетаётганида «сўнгги умид фоли»ни ишлатишга мажбур бўлди. Бир очкога эга бўлган «Жирона» биринчи ўринга кўтарилган бўлса-да, йўқотилган очколар бўйича устунлик энди «Реал»да.

Италия: «Лацио» топ-4 учун курашмоқда

«Лацио» – «Лечче» 1:0
Гол: 1:0 – 58 Фелипе Андерсон.
«Лацио» – Проведел, Марушич, Габаррон (Романиоли, 24), Ҳила, Пеллегрини (Ладзари, 65), Луис Алберто (Весино, 65), Гендузи, Ровелла, Фелипе Андерсон, Дзаккани (Иммобиле, 79), Исаксен (Педро, 46).
«Лечче» – Фальконе, Жандре (Венути, 57), Баскиротто, Понграчич, Галло (Доргу, 85), Рамадани, Гонсалес (Стрефецца, 72), Каба (Блен, 72), Уден (Пикколи, 85), Альмквист, Крстович.
Огоҳлантиришлар: Дзаккани (45), Жандре (45), Венути (75), Гендузи (77), Рамадани (81), Весино (89), Иммобиле (90), Понграчич (90).

Мавсум стартида «Лацио» клуб антирекордларини қайтадан ёзган, Маурицио Сарри истеъфо ёқасига келиб қолган ва римликлар жамоасини совринлар учун курашдан чиқариб қўйишганди. Аммо «бургутлар» аста-секин қанотларини тўғрилади ва яна парвозга чиқди. «Лечче» билан ўйинда Фелипе Андерсоннинг зарбаси келтирган ғалаба — барча турнирлар доирасидаги ўйинлар қўшиб ҳисобланганда қаторасига бешинчиси бўлди. Ўтган ҳафта — жамоа учун идеал кечди, чоршанба куни «Лацио» «Рома» билан дербида ғалаба қозониб, Италия Кубоги финалига чиққанди. Жамоа энди чемпионат турнир жадвалида «Наполи»ни ҳамда бу турда «Каляри»га ютқазган «Болоня»ни ортда қолдирган ҳолда бешинчи ўринга кўтарилди. Қолаверса, «Лацио» бир неча соат давомида кучли тўртликни якунлаб турган «Фиорентина» билан очколар бўйича тенглашиб олганди.

«Милан» – «Рома» 3:1
Голлар: 1:0 – 11 Адли, 2:0 – 56 Жиру, 2:1 – 69, пеналти Паредес, 3:1 – 84 Эрнандес.
«Милан» – Менян, Калабрия, Киер, Габбия, Эрнандес (Хименес, 89), Лофтус-Чик, Адли (Дзероли, 89), Рейндерс, Пулишич (Муса, 79), Рафаэл Леау (Окафор, 79), Жиру.
«Рома» – Свилар, Челик (Залевски, 78), Лиоренте (Ҳейсен, 78), Манчини (Пеллегрини, 46), Кристенсен, Спинаццола, Паредес, Кристанте, Бове, Ал-Шаъровий (Белотти, 61), Лукаку.
Огоҳлантиришлар: Манчини (43), Кристанте (56), Киер (71), Ҳейсен (81), Габбия (90).

Миланга ташриф олдидан Жозе Моуринионинг энг ёрқин иқтибослари китоби яна бир ажойиб ибора билан бойитилди. «Аммо биз — «Рома» бўлганимиз ва одамлар менинг исмимни Жозе Гарри Моуринио Поттер деб билишгани учун, биздан талаб даражаси сезиларли даражада ошмоқда», —деган португалиялик мутахассис мавжуд қийинчиликларни унутмасликка чақирган ҳолда. Дибала яна жароҳат олган ва Моуринионинг фикрича, жамоа усиз ўйнаши «Манчестер Сити» Ҳоландсиз ўйнашидан қийинроқ, чунки Хосеп Гвардиолада Алварес ҳам бор.

Умуман олганда, «Сан-Сиро»даги ўйин римликлар жамоаси аргентиналик юлдузисиз бутунлай бошқа жамоага айланиб қолиши тўғрисидаги қарашларни яна бир бор тасдиқлади. Аммо, мезбонлар жуда осонлик билан ҳисобни очишди - Адли битта ҳаракат билан икки ҳимоячини газонга ётқизиб, кейин бурчакка аниқ зарба йўллади. Кўп ўтмай Эрнандеснинг зарбаси тўсинга тегди, иккинчи бўлимда эса дарвозабон ҳудудида бўш қолдирилган Жиру ҳам осонлик билан дарвозани ишғол этди - ушбу француз ҳужумчиси Италиядаги қаторасига учинчи мавсумида камида ўнта гол урмоқда.

Бир йил олдин ҳам «Рома» шу майдонда умидсиз ҳолатга тушиб қолган, аммо 0:2 ҳисобидан чиқиб кетиб, «Милан»даги инқирозли даврни бошлаб берганди. Бу сафар ҳам Паредес Пеллегрини томонидан ишланган пеналтини аниқ ижро этиб, ўйинга интрига қайтарди, аммо мезбонлар бу сафар ғалабани қўлдан чиқармади. Ўйин охирида Жирунинг товонда йўллаган пасидан кейин Эрнандес яна бир чиройли гол урди. Миланликлар «Фиорентина»ни саккиз очкога ортда қолдирган ҳолда учинчи ўринни мустаҳкамлади.

Германия: кичик «Боруссия» Дортмундни хурсанд қилди

«Боруссия» М – Штутгарт 3:1
Голлар: 1:0 – 1 Ҳак, 2:0 – 19 Ҳак, 2:1 – 55 Вагноман, 3:1 – 90 Сиебатшо.
«Боруссия» М – Николас, Скалли, Элведи, Фридрих, Нетц, Вайгл, Коне (Крамер, 90), Райтц, Онора (Нгуму, 75), Ҳак (Нойҳаус, 90), Плеа (Сиебатшо, 66).
«Штутгарт» – Нюбел, Штенцел (Левелинг, 46), Антон, Загаду, Миттелштедт (Руо, 46), Вагноман, Каразор (Раймунд, 82), Штиллер, Фюрих, Мийо, Ундав.
Огоҳлантиришлар: Вайгл (35), Миттелштедт (45), Элведи (70), Раймунд (83), Мийо (83), Крамер (90).

Бир кун олдин ютқазган «Лейпциг» ортидан учинчи ўринда бораётган «Штутгарт» ҳам муаммога учради. Мавсум бошидан буён 17 гол урган Гирасси Африка Кубогига йўл олгани туфайли таркиби кучсизланган жамоа Менхенгладбахдаги ўйинда биринчи ҳужумдаёқ гол ўтказиб юборди. Ҳак тўпни бурчакка жойлаганида ўйин бошланганидан атиги 20 сония ўтказди ва бундеслигада бундай тезкор гол 2019 йилдан буён урилмаганди. Меҳмонлар тўпга эгалик қилиб, ташаббусни ўзида сақлаб турди, аммо мезбонлар хатолар учун жазолади.

Бўлим ўрталарига бориб Плеанинг нозик узатмасидан кейин Ҳак дублни расмийлаштирди. Лекин «Штутгарт»нинг асосий ҳужумчисига айланиб қолган Ундав иккита имкониятни йўққа чиқарди. Шу билан бирга у жавоб голи урилган ҳужумда ўзи истамаган ҳолда қатнашди. Тўп унинг елкасига текканидан кейин Левелингага бориб тушди, у эса Вангоманни қулай вазиятга чиқарди. Аммо меҳмонлар бошқа гол ура олишмади ва ўйин охирида қарши ҳужумдан учинчи голни ўтказиб юборишди. Таркибини Санчо билан кучайтирган ва таъқибни давом эттираётган Дортмунднинг «Боруссия» клуби эса босимни оширмоқда.

Франция: «ПСЖ» комплексларидан қутулди

«Ланс» – «ПСЖ» 0:2
Голлар: 0:1 – 30 Барколя, 0:2 – 89 Мбаппе.
«Ланс» – Самба, Гради, Данзо, Медина, Мауасса (Чавес, 46), Франковски, Диуф (Фюльжени, 74), Эль-Энауи (Сишуба, 86), Давид Кошта (Томассон, 74), Сотока, Ваи (Саид, 74).
«ПСЖ» – Доннарумма, Маркиньос, Данилу Перейра, Эрнандес, Солер (Фабиан Руис, 62), Угарте, Витинья, Заир-Эмери, Дембеле, Барколя, Мбаппе.
Огоҳлантириш: Солер (52)
Четлатиш: Гради (45).

«ПСЖ» Лансда 2014 йил октябрдан буён ғалаба қозона олмаган. Албатта, бунга лансликлар бир неча йил давомида иккинчи дивизионда ўйнагани ҳам сабаб. Аммо улар элитага қайтганидан кейин ҳам парижликлар учта сафар учрашувидан фақат биттасида қўшимча дақиқаларда ҳисобни тенглаштириб, жами бир очко олишган (=1-2). Лекин ҳар қандай серия қачондир барҳам топади, бу сафарги ўйин эса аввалбошдан мезбонлар учун яхши кечмади. 7-дақиқадаёқ Доннарумма пеналти қайтарди, Франковски тўпни марказга йўллаб адашди. Биринчи бўлим охирида эса Гради майдондан четлатилди. Бунгача Мбаппе Барколяни яккама-якка вазиятга чиқариб юбориши натижасида ҳисоб очилганди, ўйин охирида эса, «Ланс» ҳисобни тенглаштириш учун олдинга ташланганида, Килиан Дембеленинг ажойиб пасини голга айлантирди. Парижликлар бу жамоага қарши ўйинлардаги комплексларга барҳам берди. Иккинчи ўрин билан фарқ эса — саккиз очкога етди.