Шимолий Кореяда хориж сериалини томоша қилган ўсмирлар 12 йилга қамалди

Жанубий Корея сериалларини кўрганликда айбланган икки нафар 16 ёшли ўсмир КХДР суди томонидан 12 йилга озодликдан маҳрум этилди. Бу ҳақдаги видеолавҳани BBC эълон қилди.

Тахминларга кўра, видео 2022 йилда суратга олинган. Унда стадионда йиғилган юзлаб мактаб ўқувчилари олдида қўллари кишанланган икки ўсмир турганини кўриш мумкин. Ҳарбий кийимдаги эркаклар ўғил болаларни «ўз хатоларини етарлича тушунмагани» учун танбеҳ беришади.

BBC нашрининг қайд этишича, бундай видеоёзувлар камдан-кам ҳолларда мамлакатдан ташқарига чиқади, чунки КХДР ёпиқ мамлакат бўлиб, ички ҳаётни акс эттирувчи фотосуратлар, видеолар ва бошқа далилларни хорижга олиб чиқиш тақиқланган. BBC ушбу видеони шимолий кореялик қочқинлар билан ишлайдиган Жануб ва Шимол тараққиёт тадқиқот институтидан (SAND) олган.

SAND томонидан таъкидланганидек, намойиш этилган оммавий суд жараёни «хориж видеоларини томоша қилиш оқибатларини» кўрсатиш учун мўлжалланган. Видеода қуйидаги сўзларни айтаётган тарғиботчининг овозини эшитиш мумкин:

«Чириган [Жанубий Корея] қўғирчоқ режимининг маданияти ҳатто ўсмирлар орасида ҳам тарқалди. Улар атиги 16 ёшда, лекин аллақачон ўз келажагини барбод қилишган».

Кейин ҳарбийлар маҳкумларнинг исм-шарифи ва манзилларини ўқиб беришган.

Қайд қилинишича, аввал бундай қонунбузарликка йўл қўйган ўсмирлар қамалмаган, балки «қайта тарбиялаш» учун 5 йил муддатга меҳнат лагерларига жўнатилган.

Бироқ, 2020 йилда қонунлар кучайтирилган ва Жанубий Корея сериаллари ва бошқа кўнгилочар кўрсатувларини томоша қилганлик учун ўсмирлар ва ёшларга қамоқ, вояга етганларга эса ўлим жазоси жорий қилинган.