2024 йилда давлат бюджети харажатининг 50 фоиздан ортиғи ижтимоий соҳага йўналтирилади

«Дунё» хабарига кўра, ўтган даврда Ўзбекистонда ижтимоий соҳада самарали ташкилий-ҳуқуқий база яратилиб, аҳолини манзилли қўллаб-қувватлашга кўпроқ эътибор қаратилди. Бу борадаги амалдаги қонунчилик 1,6 мингдан ортиқ норматив-ҳуқуқий ҳужжатлардан иборат.

Материалда таъкидланганидек, одил ижтимоий сиёсатни амалга ошириш ва инсон капиталини ривожлантириш бўйича тизимли чора-тадбирларни назарда тутувчи 2022-2026 йилларга мўлжалланган Янги Ўзбекистоннинг тараққиёт стратегияси қабул қилиниши ўзгаришлар мантиқий давоми бўлди.

Кўрилган чора-тадбирлар натижасида биргина сўнгги уч йилда нафақа олувчи кам таъминланган оилалар сони 4 баробарга ошиб, 1,9 миллион нафарга етди. Кам таъминланган оилалар фарзандларига бола парвариши бўйича нафақалар қамрови кенгайтирилди. Нафақа тайинлашда ҳисобга олинадиган болаларнинг ёши 14 ёшдан 18 ёшгача оширилди. Унинг ҳажми ўртача 1,5 баробарга ошди, тўлов муддати эса 6 ойдан 12 ойга узайтирилди. Энг кам ишсизлик нафақаси 3,2 баравар оширилди.

«Ўзбекистон 2030» стратегияси асосий устувор йўналишлар, жумладан, фуқароларнинг юқори турмуш сифатини таъминлаш ва жамият барқарор ривожланишини таъминлашни назарда тутувчи яна бир муҳим ҳужжатдир. Стратегия БМТнинг 2030 йилгача Барқарор ривожланиш кун тартибига мос келади ҳамда Ўзбекистон барқарор ривожланиш бўйича миллий мақсад ва вазифаларини қамраб олади», — деб ёзган «Инфозакон».