Ерларни ўзбошимчалик билан эгаллаб, ноқонуний қурилиш қилаётганлар жавобгарликка тортилади — Кадастр агентлиги

Ҳозирги вақтда ерларни ўзбошимчалик билан эгаллаб, ноқонуний қурилиш қилаётганлар маъмурий ёки жиноий жавобгарликка тортилади. Бу ҳақда Кадастр агентлиги Тошкент шаҳри бошқармаси бошлиғи Бекзод Тошхўжаев маълум қилди. 

Унинг сўзларига кўра, ноқонуний ўзлаштириб олинган ҳамда мазкур ерларга ўзбошимчалик билан қуриб олинган объектларга нисбатан мулк ҳуқуқини эътироф этиш тўғрисидаги тегишли қонун Олий Мажлис қонунчилик палатаси томонидан кўриб чиқилган ва Сенатга юборилган. 

Шундан сўнг, ҳужжати йўқ уйларга кадастр ҳужжатларини тайёрлаб бериш бошланиши ҳақидаги хабарлар тарқалган. Кейин айрим «уддабуронлар» тезкорлик билан иморат қуриб олиб, «бу уйни 5-10 йил олдин қурганман деб иддао қилсам ҳужжатлаштириб оламан» деб, ҳудудларда ерларни ўзбошимчалик билан эгаллаб олаётганлар пайдо бўлган. 

«Аммо қонун чиқса, уйимга ҳужжат қилиб оламан деб ноқонуний қурилиш бошлаб юборганлар хато ўйлайди. Сабаби, Кадастр агентлиги томонидан ерларнинг ҳолатини ўрганиш бўйича космик съёмкалар, хариталари бор. Улар ёрдамида 5-10 йил, ҳатто 20 йил ортга қайтариб текширишимиз мумкин. Бу жараёнда инсонлар фақат моддий зарар кўриши билан бир қаторда, жиноий жавобгар бўлиши мумкин», деди Тошхўжаев. 

Унинг таъкидлашича, ерларни ўзбошимчалик билан эгаллаб олганлик, у ерга ноқонуний қурилиш қилганлик учун маъмурий жавобгарликдан, жиноий жавобгарликкача чоралар белгиланган. Шунинг учун улардан бу ишни тўхтатиш ва ерни асл ҳолатига қайтариш сўралмоқда. 

«Қабул қилиниши кутилаётган қонунда ҳозирги даврда эгаллаб олиб, қурилиш қилинаётган биноларга ҳуқуқни эътироф этиш назарда тутилмаган. Аксинча ҳозирда ерларни ўзбошимчалик билан эгаллаб, ноқонуний қурилиш қилаётганлар маъмурий ёки жиноий жавобгарликка тортилади», деди Тошхўжаев.