Россияда Гершковичнинг суди бошланмоқда: америкалик журналист 20 йилга қамалиши мумкин

26 июн куни Москвада бир йилдан кўпроқ вақт олдин ҳибсга олинган ва жосусликда айбланган америкалик журналист Эван Гершкович устидан суд жараёни бошланади. У 20 йилгача озодликдан маҳрум этилиши мумкин.

Фото: Donat Sorokin/TASS/dpa/picture alliance

Екатеринбургда америкалик журналист Эван Гершкович қўлга олинганидан деярли 15 ой ўтиб, унинг иши бўйича суд ёпиқ эшиклар ортида бошланади. Гершкович жосусликда айбланмоқда - «ФСБ» маълумотларига кўра, у Россия ҳарбий-саноат мажмуаси корхоналаридан бири ҳақида давлат сири маълумотларини тўплаган. 32 ёшли америкалик 20 йилгача қамоқ жазосига ҳукм қилиниши мумкин.

Эван Гершковичнинг ушланиши

The Wall Street Journal мухбири Эван Гершкович 2023 йилнинг 29 мартида Екатеринбургда қўлга олинган ва кейинчалик жосусликда айбланган. Россия Федерал хавфсизлик хизмати маълумотларига кўра, журналист «Америка томонининг кўрсатмаларига биноан Россия ҳарбий-саноат комплекси корхоналаридан бири фаолияти тўғрисида давлат сирини ташкил этувчи маълумотларни тўплаган». Гершковичнинг ўзи ҳам, нашр ҳам айбловларни рад этади. Оқ уй уларни «бемаъни» деб атади.

Гершкович 2017 йилдан бери Россияда яшаган

32 ёшли Эван Гершкович 2017 йилдан бери Россияда яшаб, аввалига The Moscow Times газетасида, кейин AFP ахборот агентлигида, 2022 йил январидан эса The Wall Street Journal’да мухбир бўлиб ишлаган. Гершкович Ню-Йоркда совет яҳудий эмигрантлари оиласида туғилган. Унинг ота-онаси 1979 йилда Америка Қўшма Штатларига кўчиб кетган.

Гершковичнинг эҳтимолий алмаштирилиши

Жорий йилнинг феврал ойида Россия президенти Владимир Путин билан интервюда америкалик журналист Такер Карлсон унга Гершковични «яхши ният белгиси сифатида» озод қилишни таклиф этди, шунда Карлсон уни Қўшма Штатларга олиб кетиши мумкин бўларди. Бунга жавобан Путиннинг айтишича, Россия шунчалик кўп хайрихоҳлик кўрсатганки, у «барча лимитни тугатганга ўхшайди». Шунга қарамай, Путин Гершковични алмашиш вариантини рад этмади.

The Wall Street Journal 2023 йил сентябрида Путин Россия махсус хизматлари ходими экани айтилаётган Вадим Красиковни озод қилишга шахсан буйруқ берганини ёзган эди. Красиков Германияда чечен бўлгинчиларининг собиқ дала қўмондони Зелимхон Ханқошвилини ўлдирганликда айбланиб, умрбод қамоқ жазосига ҳукм қилинди.

Россия АҚШ билан маҳбусларни алмашиш эҳтимолига изоҳ берди

Россияда ҳибсга олинган америкалик журналист Эван Гершкович устидан суд жараёни бошланишидан бир неча кун олдин Россия Ташқи ишлар вазирлиги Вашингтон билан эҳтимолий маҳбуслар алмашинувига изоҳ берди. Айни дамда Москва Қўшма Штатлардан «тақдим этилган ғояларга жавоб кутмоқда», деди Россия ташқи ишлар вазири ўринбосари Сергей Рябков 19 июн куни чоп этилган ТАСС агентлигига берган интервюсида.

«Тўп АҚШ томонида», деб таъкидлади у. Рябковнинг сўзларига кўра, президент Жо Байден маъмурияти Россия таклифларидан «яхши хабардор». «Мен тушунаманки, бу ғояларда нимадир америкаликларга тўғри келмаса, бу уларнинг муаммолари. Биз ёндашувларимизни тўлиқ асосли, оқилона ва мувозанатли деб биламиз», - дея қўшимча қилди ташқи ишлар вазири ўринбосари.

#Россия #Эван Гершкович