Ўзбекистон олимпия жамоасининг Парижга борадиган таркиби эълон қилинди

Аввалги рўйхатдан бир футболчи – Алибек Давронов тушиб қолди. У аввалги жароҳати сабабли Парижга йўл оладиган таркибдан ўрин олмаган.

Турнир регламентига мувофиқ, 3 нафар 23 ёшдан юқори футболчилар — Элдор Шомуродов, Остон Ўрунов ва Ҳусниддин Алиқулов жамоага жалб этилганди.

Аввалроқ, Осиё кубоги U23да иштирок этган ўйинчилардан ҳимоячи Маҳмуд Маҳамаджонов, яримҳимоячи Ҳожимат Эркинов, ҳужумчилар Отабек Жўрақўзиев ҳамда Улуғбек Ҳошимов таркибдан ўрин олмаганди.

Эслатиб ўтамиз, Ўзбекистон олимпия жамоаси Олимпиададаги иштирокини 24 июл куни Испанияга қарши ўйин билан бошлайди.

Маълумот учун, турнир давомида 18 нафар футболчи якуний рўйхатдан жой олади. Темур Кападзе жамоаси 11 июл куни Парижга учади. Олимпиада олдидан 15 июлда Гвинея, 18 июлда Янги Зеландияга қарши ўртоқлик ўйинлари ўтказилади.