Россиядан ҳафталик нефт экспорти 2022 йилдан буён рекорд даражадаги 37 фоизга қисқарди — Bloomberg

1 июлдан 7 июлгача бўлган ҳафта ичида Россиянинг нефт хомашёсини денгиз орқали экспорт қилиш 2022 йилнинг февралидан буён энг паст даражага тушган ва суткасига 2,67 млн баррелни ташкил этган. Бир ҳафта муқаддам бу кўрсаткич 3,66 млн баррелни ташкил этаётган эди ва қисқариш 37 фоизни ташкил этган. Сўнгги тўрт ҳафтадаги волатил ўртача кўрсаткич шу йилнинг февралидан буён энг паст кўрсаткичгача тушиб кетган, деб ёзади Bloomberg ўз ҳисоб-китобларига асосланиб.

Юклашлар Россиядаги қарийб барча нефт хомашёси экспорти терминалларида пасайиб кетган (Мурманск ва Сахалиндагидан ташқари). Бу ҳолда Россия нефтининг асосий импортчилари сифатида ҳамон Ҳиндистон (суткасига 1,8 млн баррел) ва Хитой (суткасига 0,9 млн баррел) қолмоқда. Bloomberg ҳисоб-китобларига кўра, «Осиёнинг бошқа давлатлари» ҳам сўнгги ҳафта ичида импортни 0,1 млндан 0,2 млн баррелгача оширган.

Агентликнинг қайд этишича, экспортнинг бу қадар кескин тушиб кетиши учун юклаш дастурларидаги носозликлар, денгизда тўфонлар каби “аниқ бир сабаб” бўлмаган.

Лекин шунга қарамасдан, Bloomberg’нинг ёзишича, экспортнинг қисқаришига Россиянинг OPEC+ мақсадли кўрсаткичларига мослашувининг яхшиланиши сабаб бўлиши мумкин. Россияда нефт қазиб олиш март ойидан июнгача тахминан суткасига 360 минг баррелга қисқарган. Украина дронлари ҳужумига дучор бўлган нефтни қайта ишлаш заводларидаги тикланиш ишлари ҳам етказиб беришнинг қисқаришига олиб келган бўлиши мумкин.

Агентликнинг қайд этишича, Россия нефт хомашёси етказиб берилишининг ялпи қиймати ҳам етти кун ичида тушиб кетган, бироқ бу таназзул тўртинчи ҳафта мобайнида ошиб бораётган нефт нархи билан юмшатилган.