60 млрд рубл эвазига Путиннинг дўсти қурган стадион ўйин ўтказишга яроқсиз бўлиб чиқди

Янги қурилган муз стадиони хавфсизлик талабларига жавоб бермаслиги тўғрисидаги хулосага июн ойининг бошларида — у ерда ёнғин юз берганидан сўнг келинган. Ўшанда электрон видеоборт, турбиналар ва стадионнинг пластик қопламаси ёниб кетган эди.

“Экспертларнинг баҳолашлари, “СКА-Арена”нинг миқёси ҳамда унинг ёнғин хавфсизлиги тизимидаги мураккабликларга кўра нуқсонлар ва камчиликларни тузатишга жуда узоқ вақт талаб этилади”, — дейишмоқда клубдагилар.

“СКА-Арена”ни қурилиш ишлари 2020 йилда бузиб ташланган “Петербургский” спорт мажмуаси ўрнида бошланган. Аввалига лойиҳа 2022 йилнинг октябрида топширилиши мўлжалланган эди, бироқ муддатлар бир неча бор сурилган. Натижада арена ўтган йилнинг декабрида топширилган. Стадион директори Дмитрий Сватковскийнинг сўзларига кўра, мажмуани қуришга 60 млрд рубл сарфланган.

“СКА-Арена”ни қурилиш билан Геннадий Тимченкога яқин бўлган “Горка” компанияси шуғулланган. Тимченко РФ президенти Владимир Путиннинг яқин дўсти ҳисобланади. Forbes ҳисоб-китобларига кўра, бизнесменнинг бойлиги 23,4 млрд долларни ташкил этади. 

Европа Иттифоқи Геннадий Тимченкони Россиянинг Украинага босқини туфайли 2022 йилнинг февралида санкция рўйхатига қўшган эди. Бизнесменга ЕИ давлатларига кириш тақиқланган, унинг Евроиттифоқ ҳудудидаги активлари музлатилган. Тимченкога нисбатан чекловлар жорий этилганининг асосий сабабларидан бири — Путин ва дўстларининг “ҳамёни” ҳисобланувчи “Россия” банкида улушга эга эканлигидир. 2014 йилда бу банк Россия банклари ичида биринчи бўлиб аннексия қилинган Қримда филиал очган эди.

Санкциялар жорий этилгач, Тимченко чекловларни олиб ташлаш талаби билан бир неча бор судга мурожаат қилган. Унинг адвокати Стефан Бонифассига кўра, тадбиркорнинг РФ президенти билан яқин алоқалари уни Украина билан урушда иттифоқчига айлантирмайди.