Олимпиаданинг 3-куни: исроилликка қарши демарш, чемпионга ҳуштакбозлик

Парижда Олимпия ўйинларининг учинчи куни ўтказилди. Душанба куни қиличбозлик, дзюдо, пневматик милтиқдан ўқ узиш, сувга сакраш, сузиш, конкур ва бошқа спорт турлари бўйича 19 та медаллар шодаси ўйналди.

Учинчи кунги баҳслардан кейин Япония 6 олтин, 2 кумуш ва 4 бронза билан биринчи ўринда бормоқда. Япониялик спортчилар душанба куни 90 йилдан ортиқ вақтдан буён от спортида илк медал — бронзани қўлга киритиб, сюрприз тақдим этишди. Бундан ташқари, олимпия дастуридаги янги спорт тури — эркаклар орасида скейтбордингда япониялик Юто Ҳоригомэ ҳам Япония учун ушбу спорт бўйича тарихдаги илк олтин медални қўлга киритди.

Дзюдо: жазоирлик исроиллик билан курашмаслик учун семирди

29 июл куни дзюдо бўйича эркаклар ўртасида 73 килограммгача бўлган вазнда баҳслар ўтказилди. Қуръага кўра, биринчи босқичда жазоирлик Дрис Редуан Мессауд Исроил вакили Тохар Бутбул билан учрашиши керак эди. Бу баҳс икки мамлакат ўртасидаги сиёсий келишмовчилик туфайли можароли кўринарди, чунки Жазоир Исроил давлати қонунийлигини тан олмайди.

Дрис Мессауд иложсиз ҳолатда қолганди, у ушбу рақибга қарши татамига чиққанида ватанида қаттиқ танқидга учраган бўларди, шу билан бирга, шунчаки баҳсдан бош торта олмасди, бунинг учун узоқ муддатли дисквалификацияга учраши мумкин эди. Токио Олимпиадасида унинг ватандоши Фети Нурин Фаластинни қўллаши ва исроилликка қарши баҳс олиб бора олмаслигини айтиб, худди шу Бутбул билан баҳсни бойкот қилганди. Натижада мураббийи Амар Бенехлеф билан биргаликда Халқаро дзюдо федерацияси томонидан «сиёсий пропаганда» учун 10 йилга дисквалификация қилинганди.

Ўшанда Бутбулнинг кейинги босқичдаги рақиби, суданлик Муҳаммад Абдулрасул эса жароҳатини баҳона қилиб, қутулиб қолганди.

Африканинг уч карра чемпиони ҳисобланган Дрис ҳам татамига чиқмасликнинг қонуний йўлини ўйлаб топди. Вазнлар ўлчанганида унинг оғирлиги 73,4 килограмм чиқди — рухсат этилганидан 400 граммга кўп. Шу туфайли жазоирлик спортчи мусобақага қўйилмади. 

Исроил миллий олимпия қўмитаси Дрисни спортга хос бўлмаган ҳаракат қилишда айблади. Аммо қуръадан кейиноқ ушбу спортчи исроилликка қарши курашмаслигини барча билиб турарди.

Тохар Бутбул кейинги босқичда бўлажак чемпион, озарбойжонлик Ҳидоят Гейдаровга ютқазиб, иштирокини якунлади. 

Париждаги ўйинларда Марокаш ва Тожикистон вакиллари ҳам исроиллик Барух Шмаиловга қарши баҳслардан кейин унга қўл беришни истамади.

Исроилликларга қарши курашдан бош тортиш ҳолатлари бошқа мамлакат вакиллари томонидан ҳам кузатилган. 2018 йилги жаҳон чемпионатида эронлик Саид Моллаеи финалда исроиллик Саги Мукига тўқнаш келмаслик учун яримфиналда атайлаб ютқазиб берган. Спортчи кейинроқ ўшанда ўз мамлакати расмийлари босимига учрагани, Исроил вакили билан курашга чиқишга рухсат берилмаганини айтган. Бу ҳолатдан кейин эронлик спортчи Германиядан бошпана топади ва турнирларда Мўғулистон байроғи остида чиқа бошлайди. Аммо Париж-2024 арафасида спорт фуқаролигини яна ўзгартирди ва энди Озарбойжон номидан қатнашмоқда.

2004 йилда эса ўша вақтда -66 кг вазн тоифасида амалдаги жаҳон чемпиони бўлган эронлик Араш Миресмаили ҳам исроиллик Эхуд Ваксга қарши курашмаслик учун, вазнини 2 килограммга ошириб олганди. Шу билан бирга, у сиёсий баёнот берган, Олимпиада учун қаттиқ меҳнат қилганига қарамай, исроиллик рақибга қарши кураша олмаслигини қайд этганди.

Эрон ҳукумати ўшанда Миресмаилига Олимпиада ғолиблиги учун тўланадиган 125 минг доллар маблағни тўлаб берган.

Теннис: Рафа Жоковичга қарши

Олимпиаданинг учинчи кунидаги энг марказий баҳс иккинчи давра доирасида Рафаэл Надал ва Новак Жокович ўртасида кечди. Шу куни Париждаги кўплаб чорраҳаларда «Рафанинг ўйинига чипта сотиб оламан» ёзуви акс этган плакат кўтарган одамларни учратиш мумкин эди.

Испаниялик Надални Францияда мухлислар ўзиникидек қабул қилишади. Унинг «Ролан Гаррос»нинг грунт кортларидаги 14 ғалабадан иборат рекордини қачондир кимдир янгилаши даргумон.

Французлар Надални шу қадар юксак қадрлашидан унга Ўйинларнинг очилиш маросимида ҳам фахрий ролни беришганди.

Баҳс бошланганида ҳам Рафанинг ҳар бир муваффақиятли зарбаси олқишлар билан қарши олинди.

Амм бундай зарбалар ғалаба қозониш учун етарли бўлмади.

Бу ушбу икки буюк теннисчининг ўзаро 60-учрашуви эди. Эътиборли жиҳати, уларнинг илк тўқнашуви ҳам Париж кортида, 2006 йилги Франция очиқ чемпионатида рўй берган.

Жокович биринчи сетда осонлик билан 6-1 ҳисобида ғалаба қозонди ва иккинчи сетда 4-0 ҳисоби вақтида Рафанинг мухлислари фақат у «нолга ютқазмаслиги»дан умид қилаётганди.

Надални бир неча йилдан буён қийнаётган белдаги жароҳати ўз сўзини айтмоқда, аммо мухлислар ўз севимлилари унинг бу қадар йирик ҳисобда ютқазишига тайёр эмасди.

Ва Рафа уларни эшитди. У кейинги тўрт геймни ўзиники қилиб, ҳисобни тенглаштирди (4-4), аммо кейин ўзи тўп узатган геймни бой берди ва Новак ўйинни ҳал қилишига йўл қўйди.

Якуний ҳисоб: 6-1, 6-4.

Жокович яккалик турниридаги иштирокини давом эттиради, Надал эса жуфтлик баҳсларида Карлос Алкарас билан кейинги босқичга чиқиб бўлган.

Рафаэл Надал - икки карра олимпия чемпиони (Пекин-2008 да яккалик разрядда ва Рио-2016 да жуфтликда). Жокович фақат Пекин-2008 да бронза медал олган.

Рафа бир неча бор жароҳатдан кейин тиклана олмаётгани туфайли фаолиятини якунлашини айтганди. Катта эҳтимол билан, бу унинг сўнгги турнири бўлади.

Британларда сермаҳсул кун

Душанба кунги баҳслар Буюк Британия жамоаси учун ўта омадли кечди.

Энг асабий баҳслардан бири маунтинбайкерлар трассасида (тоғда велосипед) кечди.

Парижга ўз олимпия титулини ҳимоя қилиш учун келган британиялик Том Пидкок сўнгги айлана арафасида ғилдираги тешилгач, тўққизинчи ўринга тушиб кетди ва пешқадам, француз Виктор Корецкийдан 40 сонияга ортда қола бошлади. Аммо Пидкок бу фарқни йўққа чиқара олди ва трассанинг ўрмондан ўтган қисмидаги сўнгги бурилишда ҳал қилувчи ҳужумни бошлади.

Британиялик ва француз ёнма-ён кета бошлашди, аммо йўлда дарахт чиқиб қолди. Улар тўсиқни икки томондан айланиб ўтишди ва яна ёнма-ён бўлиб олишди, шу вақтда контакт рўй берди. Пидкок ҳужум қилди ва ғилдираги билан Корецкийнинг ғилдирагига озгина тегинди, шунинг ўзи у секинлашиши ва ортда қолиши учун етарли бўлди.

Бу жангни жонли тарзда кузатиб турган 15 минг томошабин эса британияликка ҳуштакбозлик қила бошлади, финишда эса уни кескин норозилик билан қарши олишди.

Корецкийнинг ўзи Пидкок кучлироқ бўлганини тан олгани ҳам вазиятни ўзгартира олмади. Энди Томга Франциядаги ҳар бир мусобақасида ҳуштакбозликлар давом этиши тайин. Лекин унинг бу ғалабаси Ўйинлардаги энг ёрқин ғалабалардан бирига айланди.

Шу куни британиялик чавандозлар ҳам бешинчи бор олимпия чемпионларига айланди, бу сафар Розалинд Картер, Том Макюэн ва Лора Коллеттдан иборат жамоа зафар қучди.

Конкурда ҳам кумушни — Франция, бронзани Япония қўлга киритди, бу японлар 1932 йилдан буён ушбу спортда илк медал олиши бўлди.

Британлар 10 метр баландликдан сувга сакрашда ҳам эркаклар жамоасидан энг юқори натижани умид қилаётганди.

Токио-2020 олимпиадаси чемпиони, Токио-2020, Рио-де-Жанейро-2016 ва Лондон-2012 олимпиадаларида жами учта бронза қўлга киритган  Том Дейли Парижга 24 ёшли Ноа Уилямс билан жуфтликда келганди.

Улар мазкур йўналишда жаҳон рейтинги етакчилари қаторида, аммо кутилганидек хитойлик Лян Цзюньцзе ва Хао Янга тенг кела олишмади ва кумуш билан кифояланишди. 30 ёшли Дейли учун бу бешинчи Олимпиада саналади.

Украинанинг илк медали

Қиличбоз Олга Харлан Украина учун Париж Олимпиадасидаги илк медални тақдим этди.

У сабля йўналишида бронза учун кечган баҳсда жанубий кореялик Чои Сибинни 15:14 ҳисобида мағлуб этди.

33 ёшли Харлан Пекин-2008 олимпиадасида сабля бўйича жамоавий баҳсларда олтин медални қўлга киритган, 2016 йил Рио-де-Жанейрода эса шу йўналишда кумуш билан кифояланган.

Париждаги бронза — унинг яккалик разряддаги учинчи олимпия медали бўлди: 2016 ва 2012 йиллардаги ўйинларда ҳам у учинчи ўринни олган.

Учинчи кундан кейин Молдова ҳам яхши натижа кўрсатмоқда — 25-ўрин. Жамоа икки бронза қўлга киритган — иккисини ҳам дзюдо бўйича эркаклар ўртасидаги баҳсларда.

АҚШ учун қора кун

Учинчи кундан кейин биринчи ўринда ҳамон асосий фаворитлар АҚШ ёки Хитой эмас, балки Япония бормоқда. Кунчиқар мамлакат вакиллари 12 та медал қўлга киритиб улгурди, шундан олтитаси олтин. Япониялик мухлислар айниқса эркак гимнастикачилар ўртасидаги жамоавий баҳслардаги ғалабадан қаттиқ хурсанд бўлишди. Хитойликлар билан баҳс ўта кескин кечди ва барчасини арзимас баллар ҳал қилди.

Иккинчи ўринда ҳам АҚШ ёки Хитой эмас, Франция жойлашган. Французлар ўз уйидаги Олимпиадага қаттиқ тайёргарлик кўрганини намойиш этмоқда. Душанба куни қиличбозлик ва слаломда эшкак эшиш бўйича навбатдаги ғалабаларга эришилди. Якуний натижа: 16 (5 – 8 – 3) медал.

Яна уч жамоа: Хитой, Австралия ва Жанубий Кореяда ҳам бештадан олтин медал бор ва ушбу жамоалар медаллар сифати бўйича 3-5-ўринларда кетма-кет жойлашишган. Мунтазам равишда (сўнгги 7 тадан 6 тасида) умумий рейтингда биринчи ўринни эгаллаб келадиган АҚШ бу сафар ҳозирча кучли бешликка ҳам кира олмаяпти. Америкаликлар учун учинчи кун қора кун бўлди – сузишнинг ўзида бешта финал бўлса-да, бирорта олтин қўлга киритилмади ва жамоа олтинчи ўринда қолмоқда.

Ҳонгконг вакили, қиличбоз Ка Лун Чэун ўз делегациясига иккинчи олтинни олиб берди, Озарбойжон ҳам илк олтинга эга чиқди (дзюдочи Хейдаров).

Ўзбекистон эса ҳозирча битта олтин билан 15-ўринда жойлашган.

Умумий рейтинг: