Венесуэла президенти Мадуро Илон Маскка таҳдидидан кейин Twitter’даги кумуш белгидан айрилди

Ижтимоий тармоқ бундай ажратувчи белгини сиёсатчилар ва ҳукумат ташкилотларининг расмий аккаунтларига тақдим этади. Аммо Мадуро мазкур ижтимоий тармоқ эгаси Илон Маскка таҳдид қилганидан кейин бундай белгисидан айрилди. У аввалроқ миллиардерни жангга чақирганди.

«Илон Маск, ким менга тенг келмоқчи бўлса — ўлади, ким Венесуэлага тенг келишга уринса — ўлади. Илон Маск урушишни хоҳлайсанми? Кел, урушамиз. Илон Маск, мен тайёрман», — деган Мадуро.

Мадуро ва Маск ўртасидаги можаро Х тармоғида юзага келган. Ижтимоий тармоқ эгаси Мадурони диктатор деб атаган, бунга жавобан Николас Мадуро Маск ўзининг космик ракеталари ёрдамида Венесуэлага бостириб кирмоқчи эканини маълум қилган. 

Аввалроқ Венесуэлада Миллий сайлов кенгаши амалдаги давлат раҳбари Николас Мадуронинг ғалабасини эълон қилган президентлик сайловларидан кейин мухолифатчиларнинг минглаб тарафдорлари кўчаларга чиққани тўғрисида хабар берилганди. Венесуэладаги ижтимоий зиддиятларни кузатиш бошқармаси маълумотларига кўра, 20 та штатда 187 та норозилик акцияси қайд этилган.