Янги Зеландияда 300 дан ортиқ оилага таркибида ўлимга олиб келувчи метамфетамин бўлган конфетлар тарқатилди

Янги Зеландияда бошпанасизларга ёрдам кўрсатиш билан шуғулланувчи хайрия ташкилоти ўзи билмаган ҳолда потенциал ўлимга олиб келадиган метамфетамин дозалари билан тўлдирилган конфетлар тарқатди. Ушбу «ширинликларни» фуқаролардан бири хайрия қилган.

Ташкилот ходимлари 14 август куни озиқ-овқат пакетлари юборилган 400 киши билан боғланишга киришган. Янги Зеландия полицияси ҳолат бўйича жиноят иши қўзғатган.

Гиёванд моддаларга қарши курашиш бўйича Янги Зеландия фонди конфетларни текшириб, ҳар бир ширинлик таркибидаги метамфетамин оддий дозадан 300 баробарга кўп экани ва ўлимга олиб келишини маълум қилди.

Метамфетамин — марказий нерв тизимига таъсир кўрсатувчи синтетик гиёҳванд модда. У оқ рангда бўлиб, рангсиз ва кристалл кукун кўринишида, сув ёки спиртда тез эрийди.

Фонд вакили Бен Биркс Энгнинг сўзларига кўра, гиёҳванд моддаларни бу каби кўринишга келтириш трансчегаравий контрабанда усули ҳисобланади ва конфетларнинг аксарият қисми бутун Янги Зеландия бўйлаб тарқалган бўлиши мумкин.

Таъкидланишича, хайрия қилинган «ширинликлар»нинг ҳар бирининг улгуржи нархи 608 долларни ташкил этади. Шу боисдан номаълум шахс томонидан уларнинг топшириб юборилиши қасддан эмас, балки ўзи билмаган ҳолда амалга оширилганини таҳмин қилиш мумкин.

Фонд вакили Хелен Робинсоннинг айтишича, саккиз оила, жумладан, камида бир нафар бола зарарли конфетларни татиб кўришга улгурган. Улар «ёқимсиз» мазаси сабаб конфетларни дарҳол туфлаб ташлагани боис ҳеч бири шифохонага мурожаат қилмаган.

Робинсоннинг сўзларига кўра, хайрия ташкилоти фақат қадоқланган кўринишдаги озиқ-овқат маҳсулотларини қабул қилади. Малайзиянинг Rinda бренди ёрлиғи ёпиштирилган ананасли конфетларни ҳақиқийсидан ажратишнинг имкони бўлмаган.