Ярмиш ва Певчих Россияда террорчи ва экстремистлар қаторига киритилди

Алексей Навалнийнинг колонияда ўлимидан роппа-роса олти ой ўтгач, Росфинмониторинг унинг шериклари ва адвокатларини «террорчилар ва экстремистлар» рўйхатига қўшди. Жумладан, Кира Ярмиш ва Мария Певчих реестрга киритилди.

Фото: AP

Росфинмониторинг томонидан тузилган «террорчилар ва экстремистлар» рўйхатига роппа-роса олти ой олдин колонияда вафот этган Алексей Навалнийнинг бир қанча шериклари ва адвокатлари киритилди. Жумладан, 16 август, жума куни реестрга сиртдан ҳибсга олинган Коррупцияга қарши кураш халқаро жамғармаси («ФБК») раҳбари Мария Певчих ва Алексей Навалнийнинг собиқ матбуот котиби, ҳозирда унинг беваси Юлия Навалная билан ишлаётган Кира Ярмиш ҳам қўшилди.

Мухолифатчининг собиқ адвокатлари Александр Федулов ва Олга Михайлованинг ҳам «экстремистлар ва террорчилар» деб таснифланган. Уларнинг иккаласи ҳам Россияни тарк этган ва «экстремистик жамият»да иштирок этганликда айбланиб, сиртдан ҳибсга олинган. Росфинмониторинг аллақачон Алексей Навалнийнинг яна уч адвокатини - ҳибсга олинган Вадим Кобзев, Алексей Липцер ва Игор Сергунинни 2023 йил ноябр ойида «террорчилар ва экстремистлар» рўйхатига қўшган.

Росфинмониторинг рўйхатига «Популярная политика» YouTube-канали бошловчиси Дмитрий Низовцев, «Навалний LIVE» канали продюсери Нина Волохонская, шунингдек, Навалнийнинг яширин штабларида иштирок этганлик ва «ФБК»га маблағ ажратганликда айбланиб судланган Алексей Маляревский, шунингдек, Коррупцияга қарши кураш фонди ҳақида ёзган ва «экстремистик ташкилот» билан ҳамкорликда айбланган журналистлар, ҳозирда тергов ҳибсхонасида бўлган Олга Комлева ва Антонина Фаворская киритилди. «Мемориал» уларни сиёсий маҳбуслар деб тан олган.