Қўшимча функционаллар
-
Тунги кўриниш
Кремл Путиннинг янги ядровий ракеталари синови муваффақиятсиз кечганидан бехабар эканини маълум қилди
Август ойида Архангелск областидаги Плесецк полигонида «Сармат» ракеталарининг тест синовини муваффақиятсиз ўтказилган. Путиннинг матбуот котиби бундан хабари йўқ эканини айтиб, ҳарбийлардан сўраш кераклигини билдирди.
Кремл Плесецк полигонида учирилган РC-28 «Сармат» қитъалараро баллистик ракетанинг тест учирилиши муваффақиятсизликка учраганидан бехабар. Бу ҳақда Россия президентининг матбуот котиби Дмитрий Песков маълум қилди.
«Биз бу борада ҳеч қанақа маълумотга эга эмасмиз. Бу, катта эҳтимол билан ҳарбийларимиз ваколатида бўлган савол. Шунинг учун уларга мурожаат қилиш тавсиясини бераман», — дейди Песков.
22 август куни Россия Архангелск областидаги Плесецк полигонида «Сармат» ракеталарининг тест синовини муваффақиятсиз ўтказгани маълум бўлди. Дастлабки маълумотларга кўра, жанговар ўқ-дорилар шахтанинг ўзида портлаб кетиб, полигонни вайрон қилган. Ҳодиса вақтида ракета ядровий каллаклар билан жиҳозланган бўлмаган.
Ижтимоий тармоқларда тарқалган суратларда портлаш юз берган жойда улкан ўра пайдо бўлган тасвирланган. OSINT таҳлилчисига кўра, портлашга ракетага ёнилғи қуйиш вақтида келиб чиққан ёнғин сабаб бўлган. Шунингдек, унинг таъкидлашича, бу «Сармат»нинг тўртинчи марта муваффақиятсизликка учраган синови ҳисобланади. Биринчи ва охирги муваффақиятли синов 2022 йил 20 апрелда ўтказилган холос.
Ёнғинларни қайд этувчи FIRMS мониторинг тизими полигон ҳудудида улкан ёнғин содир бўлганини тасдиқлади — бу портлаш ҳақидаги версия ҳақиқат эканига исбот бўлад олади.
2023 йилнинг кузида Владимир Путин «Сармат» ракета мажмуалари 1980 йиллардан бери қуролланишда турган «Воевода» қитъалараро ракеталар ўрнини эгаллашини, аммо ҳозирда у серияли ишлаб чиқарилмаётганини маълум қилганди. «Сармат»ни яратиш ишлари 2013 йилда бошланган ва Путин ўшандаёқ ракета 2020 йилда бориб фойдаланишга топширилишини ваъда қилганди. Аммо шунча саъй-ҳаракатга қарамай, тизим ҳамон қуролланишдан ўрин олмаган.
Маълумотларга кўра, Россия ихтиёрида 40 тагача «Воевода» ракеталари бор, бироқ ҳарбий эксперт Павел Лузиннинг фикрича, ушбу маълумотлар ҳақиқий вазиятни ифодаламайди. «Амалиётда биз уларнинг сони нолга тенг деб ҳисоблашимиз мумкин, чунки ракеталарнинг яроқлилик муддати аллақачон тугаб бўлган», — дейди у.
