Google Еврокомиссияга Microsoftʼнинг рақобатга зид булутли амалиёти устидан шикоят киритди

Google Microsoft корпорациясини монополияда айблаб, Европа комиссиясига унинг устидан шикоят киритди, деб хабар беради Reuters.

Google компанияси Microsoftʼни Windows дастурий таъминотидан фойдаланиб, мижозларни ўзининг Azure булутли платформасига боғлаб қўйиш ва уларни бошқа муқобил вариантга осон ўтиш имкониятидан маҳрум қилганликда айбламоқда.

Google маълумотларига кўра, учинчи томон булут хизматларидан фойдаланиш Microsoft томонидан «жиддий санкциялар» қўлланилишига олиб келади. Рақобатчининг инсофсиз усуллари танловнинг торайиши ва нархларнинг ошишига олиб келган. Шикоятда келтиришича, Azure’да Windows учун дастурий таъминотни кўчириш учун деярли маблағ тўланмаса, рақобатчиларга ўтиш учун «Windowsʼнинг янги сервер лицензияларини харид қилишга 400 фоизли устама тўлаш керак бўлади».

Google, шунингдек, Microsoft ўзларининг Windows-иловаларини бошқа «булутга» кўчираётган мижозлар учун фойдаланувчи тажрибасини ёмонлаштираётганидан хавотирда ва уни молиявий санкцияларни Azure’нинг асосий рақобатчилари — Amazon Web Services (AWS), Google Cloud Platform ва Alibaba Cloud’га қўлланилаётганида айбламоқда.

«Microsoftʼнинг рақобатга қарши амалиётлари ЕИ иқтисодиёти учун миллиардлаб долларга тушади, унинг киберхавфсизлигига салбий таъсир кўрсатади ва инновацияни чеклайди», — деб ёзади Googleʼнинг булутли сервислар бўйича вице-президенти Амит Завери.

Google Европа комиссиясидан Microsoftʼни бошқа булутли сервислардан фойдаланишга қўйилган чекловни олиб ташлашга мажбурлашини хоҳламоқда. «Мен бу лицензиялар учун пул тўлаган эканман улардан истаган жойимда фойдалана олиш имкониятим бўлиши керак», — дея таъкидлайди Завери.