Исроил армияси Эроннинг ракета зарбаси ниҳоясига етганини эълон қилди

ЦАҲАЛ кўплаб ракеталар уриб туширилганини маълум қилиб, аҳолига бошпаналардан чиқишга рухсат берди.

Фото: Reuters

Исроил Мудофаа кучлари (ЦАҲАЛ) Эроннинг ракета зарбаси ниҳоясига етганини маълум қилиб, аҳолини бошпаналардан чиқишига рухсат берди.

«Вазиятни баҳолагандан сўнг, энди мамлакатнинг барча ҳудудларида қўриқланадиган бошпаналарни тарк этишга рухсат берилди. Биз жамоатчиликдан Фронт орти қўмондонлигининг кўрсатмаларига амал қилишни давом эттиришни сўраймиз», дейилади хабарда.

1 октябр куни кечқурун Эрон Ислом инқилоби қўриқчилари корпуси (ИИҚК) Исроил томон ракеталарни учириб, буни ҲАМАС ва «Ҳизбуллоҳ» етакчиларининг ўлимига жавобан қасос деб атади.

Jerusalem Post хабарига кўра, Эрон 500 га яқин ракетани учирган ва бу Исроилга энг кенг кўламли зарба бўлган.

Ракеталар учирилгач Исроил, Иордания ва Ироқ ўз ҳаво ҳудудини зудлик билан ёпди.

Қайд қилинишича, Исроилнинг маркази ва жанубида бир нечта ракета ердаги объектларга қулаган, етказилган зарар баҳоланмоқда. Қурбонлар ҳақида ҳозирча маълумот йўқ.

«Биз кўплаб ракеталарни уриб туширдик. Аммо марказда ва жанубда баъзи объектларга зарба берилди», деди ЦАҲАЛ вакили Даниэл Ҳагари.

ЦАҲАЛ бу зарбалар Эрон учун оқибатларга олиб келишидан огоҳлантирди.

#Эрон #Исроил #Ислом инқилоби муҳофизлари корпуси