ABBYY IT-компанияси россияликларни уч мамлакатдаги офисида ишдан бўшатди

Матнни аниқлаш бўйича дастурий таъминот ишлаб чиқарувчи ABBYY Кипр, Венгрия ва Сербиядаги халқаро офисларида Россия фуқаролигига эга бўлган ходимларни ишдан бўшатди. Бу ҳақда Х ижтимоий тармоғида 30 сентябр, душанба куни ишдан бўшатилган россияликлар хабар берди.

Кипрдаги ABBYY офисининг ходими биринчи бўлиб Россия фуқаролиги туфайли ишдан бўшатилгани ҳақида шикоят қилди. Кейинчалик компаниянинг Сербия ва Венгриядаги ваколатхоналари раҳбариятининг шунга ўхшаш қарори ҳақида маълум бўлди. Журналист Дмитрий Низовцевнинг сўзларига кўра, ABBYY раҳбарияти ёпиқ йиғилишда Россия паспортига эга бўлган ишчилар ишдан бўшатилганини эълон қилиб, улар учун чатни ёпган, видео ва овозни ёқишни тақиқлаган. Ёпиқ йиғилишдан сўнг дарҳол ишдан бўшатилган ходимларнинг корпоратив аккаунтлари ўчирилди.

Анонимлик шарти билан ушбу маълумотни "Настоящее время" телеканалига Белграддаги IT-корпорация ходимларидан бири тасдиқлади. Унинг фикрига кўра, россияликларнинг ишдан бўшатилишининг сабаби ABBYY мижозлари Россия Федерацияси фуқаролари ўз ҳужжатлари билан танишишни хоҳламаган йирик Америка компаниялари эканлигидадир. Forbes манбаларига кўра, бир кун ичида ABBYY компаниясида 200 нафардан 300 нафаргача ходим ишдан айрилган.

ABBYY компаниясига 1989 йилда еревалик Давид Ян томонидан асос солинган. Корпорация бош қароргоҳи АҚШда жойлашган. 2022 йилда Россиянинг Украинага кенг миқёсли босқинидан сўнг, ABBYY Россия бозорини тарк этди.