OpenAI 6,6 млрд доллар инвестиция жалб этди. Ҳозирда компания 157 млрд долларга баҳоланмоқда

ChatGPT чат-ботини яратган OpenAI компанияси янги инвестиция раунди доирасида 6,6 миллиард доллар жалб қилди, деб хабар беради The Wall Street Journal.

Инвестиция раундида иштирок этганлар номи расман эълон қилинмади. Нашр маълумотларига кўра, OpenAI қарийб 1 миллиард долларни Microsoft компаниясидан, 100 миллион долларни эса Nvidia’дан олган. Энг йирик инвестор эса Thrive Capital венчур фирмаси бўлган — у 1,25 миллиард доллар инвестиция киритган.

WSJ’нинг қайд этишича, инвесраундда иштирок этганлар OpenAI икки йил давомида фойда келтиришни бошламаса, ундан ўз пулларини олиб чиқиб кетиш ҳуқуқига эга.

Ҳозирда компаниянинг жалб этилган инвестициялар билан биргаликдаги қиймати 157 миллиард долларга баҳоланмоқда. Бу йил бошидаги кўрсаткичдан салкам икки баробарга кўп (ўшанда компания 86 миллиард долларга баҳоланган эди).

OpenAI сунъий интеллект бозоридаги энг машҳур компания ҳисобланади. ChatGPT’дан ҳозирда дунё бўйлаб 250 миллион киши фойдаланмоқда.

Аввалроқ Apple корпорацияси ChatGPT’ни яратган OpenAI компаниясини молиялаштириш бўйича музокаралардан чиққани тўғрисида хабар берилганди. Нашрнинг қайд этишича, Apple бошқа йирик юқори технологияли компанияга молиявий сармоя киритиш имкониятини муҳокама қилгани бу — камдан кам учрайдиган ҳолат ҳисобланади.