Осиёдаги энг катта круиз лайнери Японияда бузилиб қолди

Spectrum of the Seas круиз лайнери Япониянинг Йокогама портида бузилиб қолди. Лайнер Шанхайдан Японияга етти кунлик круизни амалга ошириб, 7 ноябр куни яна ортга қайтиб кетиши керак эди.

Йўловчилардан бири Reddit ижтимоий тармоғига техник носозлик сабаб кема Йокогама портидан чиқа олмаганини ва сафар икки кунга ушланиб қолинишини ёзиб қолдирди. «РБК» нашрига кўра, лайнер бортида 500-600 нафарга яқин россияликлар ҳам бор.

Royal Caribbean International компанияси йўловчиларга круиз учун тўланган маблағларни 100 фоиз қайтаришга, шунингдек, йил давомида кейинги саёҳатлар учун 50 фоиз чегирма тақдим этишга ваъда берди. Telegramʼдаги Shot каналининг ёзишича, кема бортидаги барча алкогол маҳсулотлари бепул қилинган.

CrusieMapper сервиси маълумотларига кўра, круиз лайнери айни вақтда ҳам Йокогама портида қолмоқда, кема 9 ноябр куни Шанхайга етиб келиши қайд этилган.

Spectrum of the Seas — Осиёдаги энг йирик круиз лайнери. У 4,9 мингга яқин йўловчига хизмат кўрсата олади.