Янги Зеландияда кўкйўтал эпидемияси эълон қилинди

Мамлакат Соғлиқни сақлаш вазирлиги бир неча ҳафта давомида бутун Янги Зеландия бўйлаб касалланиш ҳолатлари узлуксиз ошиб борганини маълум қилди.

Фото: The Press

Янги Зеландия Соғлиқни сақлаш вазирлиги мамлакатда кўкйўтал эпидемиясини эълон қилди. Идора маълумотларига кўра, охирги бир ойда бу турдаги касаллик 260 дан ортиқ одамда аниқланган.

«Бир неча ҳафта давомида бутун мамлакат бўйлаб касалланиш ҳолатлари узлуксиз ошиб борди, ҳозир у умуммиллий эпидемия эълон қилиш мумкин бўлган даражада етди», — дейилади баёнотда.

Соғлиқни сақлаш вазирлиги мутахассисларининг маълумотларига кўра, кўкйўталга асосан маори ва Тинч океани халқлари орасида янги туғилган чақалоқлар чалинмоқда.

Кўкйўтал нафас йўлининг жуда хавфли бактериал инфекцияси ҳисобланиб, унинг қўзғатувчиси Bordetella pertussis бактериясидир. Инфекцияга йўлиққан киши йўталиши ёки акса уриши оқибатида ҳавога микроб тарқалади ва шу яқин атрофда нафас олган одам зарарланади.

Ҳозирги кунда ушбу хасталикни биринчи навбатда вакцинациянинг тўлиқ давридан ўтмаган чақалоқлар ҳамда иммунитети заиф бўлган ўсмир ва катталар бошдан ўтказишади. Олимларнинг таъкидлашича, эмлашнинг амал қилиш муддати — тахминан 4-14 йил. Қанча кўп вақт ўтса, касалланиш эҳтимоли ҳам юқорилашиб боради.

Кўкйўталдан асосан ёшга етмаган чақалоқлар нобуд бўлади. Шунинг учун ҳомиладор аёллар ва чақалоқ яқинида бўладиган кишиларнинг касалликдан эмланган бўлиши жуда катта аҳамиятга эга.