Янги Зеландияда соҳилга чиқиб қолган 30 дан ортиқ қора делфин қутқарилди

Янги Зеландия шимолидаги Руакака қирғоғига чиқиб қолган 30 дан ортиқ гринд(қора делфин)лар тўдаси қутқарилди, деб хабар бермоқда BBC расмийларга таяниб.

Табиатни муҳофаза қилиш департаменти (DOC) маълумотига кўра, уларнинг кўпчилиги саёзликдан чиқарилиб, денгизга ташланди, аммо учта катта ва битта ёш гринд нобуд бўлган. Департамент делфинлар яна соҳилга чиқиб қолмаслиги учун тун давомида пляжни кузатди.

Қутқарув ишларига юзлаб одамлар, жумладан, маҳаллий маори қабиласи, ҳукумат ва жамоатчиликнинг бошқа вакиллари қўшилди. Улар қора делфинларни чойшаблар ёрдамида сувга қайтарди.

Бундан ташқари, душанба куни соҳилда нобуд бўлган тўрт гринд учун маори маросими ўтказилди. Янги Зеландиянинг туб аҳолиси ушбу жониворларни муқаддас деб ҳисоблайди.

Делфинлар ва китлар Янги Зеландия қирғоқларига тез-тез чиқиб қолади. Кўп ҳолларда бунинг сабаби номаълум, лекин ҳайвонлар саёз қирғоқлар туфайли йўналишини йўқотиши мумкин, деб тахмин қилинади.

1840 йилдан буён Янги Зеландияда беш мингдан ортиқ кит ва делфинларнинг қирғоққа чиқиб қолиш ҳолатлари қайд этилган. Охирги оммавий ҳодиса 2024 йил апрел ойида кузатилган: ўшанда 100 та гринд саёзликка чиқиб қолганди, улардан 31 таси нобуд бўлган.