Туркияда россиялик фаолнинг ўлдирилиши бўйича иш қайта кўриб чиқилади

Туркияда суд россиялик фаол Анастасия Емелянованинг ўлдирилиши бўйича оқлов ҳукмини бекор қилди. Иш янги суд муҳокамасига юборилди.

Туркиянинг Эрзурум шаҳри минтақавий суди ўз қаллиғи - россиялик фаол Анастасия Емеляновани ўлдирганликда айбланган Сурия фуқароси Муҳаммад Низар Арнабеҳга нисбатан оқлов қарорини бекор қилди. Бу ҳақда 26 ноябр, сешанба куни "Медиазона" суд қарорига таяниб хабар берди.

12 ноябрдаги ҳужжатда айтилишича, апелляция комиссияси оқлов ҳукми устидан берилган шикоятни асосли деб топгани учун ишни янгидан кўриб чиқиш учун қайтариб юборган. Туркиянинг DHA нашри маълумотларига кўра, Арнабеҳ 2025 йил январида яна суд олдида жавоб беради.

Анастасия Емелянованинг ўлими

Анастасия Емелянованинг ўлими ҳақида 2023 йил сентябр ойида маълум бўлди, унинг жасади Эрзурумдаги ижарага олинган квартирадан топилган. Емелянованинг қаллиғи, Сурияда туғилган Муҳаммад Низар Арнабеҳ қотилликда гумонланиб ҳибсга олинган. Айбловга кўра, Арнабеҳ Емеляновани калтаклаган ва оёғини шиша бўлаги билан кесиб ташлаган, шундан сўнг у қон йўқотишдан вафот этган.

Тергов давомида Емелянованинг қаллиғи кўрсатмаларини бир неча бор ўзгартирди. Дастлабки баёнотга кўра, жанжал пайтида у Емеляновани беихтиёр туртиб юборган ва у шиша стол устига қулаган. Аммо кейин Арнабеҳ қизнинг оёғига шиша бўлаги билан бир неча марта урганини тан олди. Ҳатто кейинроқ, у ўша куни кечқурун уйда умуман бўлмаганини ва ишдан қайтганида қаллиғини квартирада ўлик ҳолда топганини даъво қила бошлади.

Туркия суди россиялик фаолни ўлдиришда айбланган шахсни оқлади

Туркиянинг Эрзурум шаҳар жиноят ишлари бўйича биринчи суди май ойи охирида ўзининг қаллиғи, россиялик фемактивист Анастасия Емеляновани ўлдиришда айбланган Сурия фуқароси Муҳаммад Низар Арнабеҳни оқлаганди.

32 ёшли Емелянованинг жасади 2023 йил сентябрида Эрзурумдаги ижарага олинган квартирадан топилган, у ўзининг қаллиғи, 29 ёшли Арнабеҳ билан кўчиб келган. Эркак қасддан одам ўлдиришда айбланган. Туркия прокуратураси Арнабеҳ учун умрбод қамоқ жазосини талаб қилди.

Емеляновалар оиласининг адвокати Бегум Осма суд қароридан афсусда эканини билдириб, апелляция ҳуқуқидан фойдаланишга ваъда берганди.