Австралия интернет компанияларни маҳаллий ОАВ контенти учун пул тўлашга мажбур қилади

Meta ва Google каби йирик технологик компаниялар ўз платформаларига Австралия янгиликларини жойлаштиргани учун мамлакат ғазнасига пул тўлашини таъминлайдиган қонун лойиҳаси ишлаб чиқилди.

Фото: Getty Images

Австралия ҳукумати йирик технологик компаниялар, жумладан, Meta ва Google ўз платформаларига миллий янгиликлар контентини жойлаштиргани учун пул тўлашини хоҳламоқда. Бу борадаги тегишли қонун лойиҳасини 12 декабр куни молиявий сервислар вазири Стивен Жонс ва коммуникация вазири Мишел Роуленд тақдим этди.

Ҳужжатга кўра, Австралияда даромади 160 миллион доллардан ошадиган ижтимоий тармоқлар ва қидирув тизимлари давлат ғазнасига солиқ тўлайди. Бунинг эвазига улар ўзларининг платформасига Австралия ОАВнинг янгиликлар контентларини жойлаштириши мумкин бўлади.

Солиқ миқдори ҳозирча белгиланмаган. Компаниялар ОАВ билан тижорий битим имзоласа ва контент учун тўғридан-тўғри пул тўласа, солиқдан озод этилиши мумкин.

Янги ташаббус 2021 йилда қабул қилинган Австралия ОАВнинг янгиликлар контентидан фойдаланиш тўғрисидаги қонунини такомиллаштиради. Коммуникация вазири Мишел Роуленднинг таъкидлашича, 2021 йилги қонун ҳам технологик компанияларга янгиликлар учун пул тўлаш мажбуриятини юклаган, аммо платформалар Австралия янгиликларини эълон қилмасдан, уни четлаб ўтишга муваффақ бўлган.

Аввалроқ Австралияда болаларга ижтимоий тармоқлардан фойдаланишни тақиқловчи қонун қабул қилинган эди. Қонунга кўра, TikTok, Facebook, Snapchat, Reddit, X ва Instagram каби йирик ижтимоий тармоқлар 16 ёшгача бўлган фойдаланувчиларнинг аккаунт яратишига йўл қўймаслиги керак.